Heyva Sor alîkariyê dide malbatên mexdûrên lehiyan

Li bajarê Hesekê Heyva Sor a Kurd alîkariyê dide malbatên ku di lehiyê de ziyan dîtiye. Pirsgirêkên wan ên tenduristiyê çareser dikin û dermanan didin nexweşan. 

Komên tenduristiyê yên girêdayî Heyva Sor a Kurd li taxa El Neşwa digerin. Rewşa malbatên ku di rabûna lehiyê de ziyan dîtine, dişopînin. Pirsgirêkên wan ên tenduristiyê çareser dikin û dermanan didin nexweşan.

Heyva Sor a Kurd destwerdana lezgîn dike, malbatên di lehiyê de asê dimînin xelas dike û malên di bin xetereya lehiyê de, vala dikin.

Her wiha komên Heyva Sor a Kurd li taxan digerin, ziyanan belge dikin û hewl didin pêdiviyên malbatên di lehiyê de ziyan dîtine, peyda bikin.

Berî 2 hefteyan li herêma Cizîrê baran gelekî zêde bariya û rêjeya ava kanî û çeman bilind bû û piştî çend salan ji nû ve herikîn. Li hin deveran jî lehî rabûn.

Piştî ku baran bariya rêjeya ava çemê Ceqceq ê di bajarê Hesekê re derbas dibe û çemê Xabûr bilind bû. Taxên ku nêzî çeman bûn di bin avê de man, riya navneteweyî ya M4 hate girtin û li hinek cihan ziyan dît. Her wiha ji ber lehiyê zêdetirî 500 malbat di navbera 24 saetên borî de ji malên xwe derketin.

Şaredariya Gel a Hesekê û Heyva Sor a Kurd ji bo li pêşiya lehiyê bigire û şêniyan biparêzin, satirên axê radikin û kanalên avê vedikin.

Ji ber ku rêjeya çemê Xabûr bilind bûbû, li taxa Xiwêran, El Neşwa û Mêrîdiyan ên Hesekê mal di nav avê de mabûn.

ANHA