Hevserokê berê yê Meclisa Hesekê şehîd Xebat Silêman hat oxirkirin

Meclisa Malbatên Şehîdan a bajarê Hesekê yê kantona Cizîrê bi merasîmekê hevserokê berê yê Meclisa Bajarê Hesekê û endamê Partiya Yekitiya Demokratîk (PYD) şehîd Xebata Silêman li Goristana Şehîd Dijwar a gundê Dawûdiyê oxir kir. Xebat Silêman duh di encama krîza dil de şehîd bû.

Di merasîmê de xelkê kantona Cizîrê, nûnerên ji Rêveberiya Xweseriya Demokratîk, şêxên eşîrên Ereb û Kurd, nûnerên partiyên siyasî, hêzên leşkerî û ewlehî beşdar bûn.

Beşdaran cenazeyê şehîd Xebata Silêman ji pêş avahiya Meclisa Malbatên Şehîdan wergirt û bi siloganên şehîd namirin ber bi goristanê ve ketin rê.

Li goristanê, endama Meclisa Malbatên Şehîdan a Hesekê Rewan Şêxo sersaxî da malbata şehîd û kedên şehîd ên di rêxistinkirina civakê de ji destpêka şoreşê ve silav kir.

Li aliyekî din jî hevseroka PYDˋê Perwîn Yûsif jî got: "Şehîd Xebat di Şoreşa Rojava de fedekariyên mezin pêşkêş kirin. Ji destpêkê ve tev li xebata saziyên şoreşê dûrî berjewendiyên takakesî û malbatî bû."

Hevserokê Meclisa Rêvegber a Rêveberiya Xweseriya Demokratîk a kantona Cizîrê Telat Yûnis jî sersaxî da malbata şehîd Xebat, PYDˋê, tevahî pêkhateyên Bakur û Rojhilatê Sûriyeyê û di şexsê şehîd de tevahî şehîdên azadiyê bi bîr anîn.

Li ser navê Meclisa Rûspiyan a Hesekê şêx Ekrem Mehşoş jî diyar kir ku şehîd Xebat tevî malbata xwe ya neteweyî ji bo tevahî pêkhateyên Herêma Bakur û Rojhilatê Sûriyeyê fedekariyên mezin pêşkêş kirin.

Di dawiyê de wesîqeya şehîd Xebat Silêman hat xwendin û radestî malbatê hat kirin.

(fr)

ANHA