Gerîlaya azadiyê Dunya Dicle li Girkê Legê hat bibîranîn

Meclisa Malbatên Şehîdan a  bajarê Girkê Legê yê kantona Cizîrê ji bo gerîlaya HPG’ê Dunya Dicle (Sozdar Dîlî Hesen) a ku 26ˊê Mijdara 2024ˊan li herêma Zapê ya Herêmên Parastinê yên Medyayê şehîd bûbû, merasîmek li dar xist. Merasîm li pêş avahiya Sendîkaya Karkeran a li bajarokê Rimêlanê yê Girê Legê bi amadebûna bi sedan xelkê Girkê Legê, Rimêlan, Dêrik, Çilaxa, koçberên Efrînê û endamên saziyên sivîl pêk hat.

Di merasîmê de endama Meclisa Malbatên Şehîdan Narîşan Berekat axivî û diyar kir ku fedakariya şehîdên wek şehîd Dunya Dicle bingehên azadiyê ava dike, qeydên koletiyê yên li jinê û civakê hatine ferzkirin dişikîne.

Li ser navê Meclisa Kongra Star a Dêrikê jî Wefa Elî  axivî û diyar kir ku şehîd Dunya sembola fedakarî û baweriya bi doza gelê xwe bû. Her wiha anî ziman ku wê bîranînên şehîdan bibin çira û rêyan ronî bikin.

Li ser navê rêxistina Partiya Yekitiya Demokratîk (PYD) Yûnis Hacî jî destnîşan kir ku fedakariyên şehîdan ronahiya rêya azadiyê ne û ev tişt anî ziman: "Şehîd Dunya ne tenê gerîlayek bû, lê li hember zulmê dengê rastiyê bû. Xwedîderketina li keda şehîdan ji bo her kesên bi azadî û demokrasiyê bawer e berpirsiyariyek e."

Dayika şehîd Dunya Dicle, Fatme Lekto anî ziman ku ew bi şehadeta keça xwe serbilind e û got: "Tevî ku êşa dûrketin û nedîtinê jî giran e, lê serê min bi wê bilind e, ji ber ku keça min rêya têkoşîn û rûmetê hilbijart û di oxira azadiya gelê xwe de canê xwe da. Ne ji bo lawaziya digirîn, lê ji ber serbilindiyê. Weke keça min bi lehengî kiriye, em ê li hember zulmê têkoşîna xwe bidomînin."

Di dawiyê de wesîqeya şehîd hat xwendin û di nava tilîliyên dayikan de radestî malbatê hat kirin.

(fr)

ANHA