’Em ê tola şehîdan li erdê nehêlin, em ê li ser şopa wan bin’

Cenazeyê şervanê Hêzên Sûriyeya Demokratîk (QSD) şehîd Rojava (Ehmed Silêman) ku di 10’ê Çileyê de li bendava Tişrînê şehîd bûbû, bi merasîmekê li Pakrewangeha Şehîd Delîl Sarûxan a bajarê Qamişloyê hat oxirkirin.

Bi sedan şêniyên Qamişloyê, heval û malbatên şehîdan, endamên partiyên siyasî, saziyên Rêveberiya Xweser û yên civaka sivîl beşdarî merasîma oxirkirinê bûn.

Piştî deqeyekê rêzgirtinê, endamê Meclisa Malbatên Şehîdan a Qamişloyê Kêfo Osman li ser navê meclisê axivî û got: "Gelê Qamişloyê, gelê Kurd, ev e taxa Enteriyê keleha şehîdan e û em bejna xwe li ber wan şehîdên pîroz ditewînin. Nirxê wan bilind e û ew in rêberê me.”

Ji fermandarên Meclisa Leşkerî ya Qamişloyê Nezîr Sofî jî diyar kir ku di dîroka Bakur û Rojhilatê Sûriyeyê de îro gelê Kurd li hember dijiminê hovane şer dike û li ber xwe dide.

Hevalên şehîd Rojava yên ku di çeperên berxwedanê yên li bendava Tişrînê û Qereqozaqê de dengê xwe ji malbatê re şand û got: “Em ê tola wan şehîdan li erdê nahêlin û em ê şopa wan berdewam bikin û em soza xwe nû dikin."

Li ser navê malbatê Cuma Xelîl axivî û diyar kir ku ev şehîdê çaremîn ji vê malbatê ye û wiha got: "Em soz didin ku çekên wan şehîdan li erdê nahêlin û em ê heya dawiyê li ber xwe bidin.”

Di dawiyê de belgenameya şehîd hat xwendin û radestî malbata wî hat kirin. Piştre hevalên şehîd bi slogana "Şehîd namirin" li Pekrewangeha Şehîd Delîl Sarûxan spart axê.

(re/k)

ANHA