Cenazeyê şehîd Egîd Efrîn hat veşartin
Cenazeyê şervanê HRE′yê Egîd Efrîn li Goristana Şehîdên Berxwedana Serdemê hat veşartin.
Şervanê Hêzên Rizgariya Efrînê (HRE) Egîd Efrîn (Selah Reşîd) di qonaxa duyemîn a Berxwedana Serdemê de şehîd bû. Cenazeyê wî îro bi merasîmekê hat veşartin.
Şêniyên kantona Efrîn û Şehbayê cenazeyê şehîd Egîd Efrîn ji nexweşxaneya Avrîn a navçeya Fafînê ya kantona Şehbayê wergirt û ber bi Goristana Şehîdên Berxwedana Serdemê ya navçeya Ehresê ve bi rê ketin.
Li goristanê merasîmek hat lidarxistin. Rêvebera Meclisa Malbatên Şehîdan Sureye Hebeş sersaxî da malbata şehîd û tevahiya şêniyên kantona Efrîn û Şehbayê û bal kişand ser fedakariya şehîdan di rêya pêkanîna demokrasî, azadî û rizgakirina deverên dagirkirî de.
Sureye Hebeş tecrîda girankirî ya li ser Rêber Abdullah Ocalan hatiye ferzkirin şermezar kir û got, Rêber Abdullah Ocalan rêya azadiyê ya gelên bindest ronî kir.
Sureye Hebeş soza şopandina rêya Rêber Abdullah Ocalan û belavkirina fikrên wî da.
Piştre, endamê Meclisa Giştî ya Partiya Yekitiya Demokratîk (PYD) Welîd Dîngilî banga hevgirtin û sekna li hemberî planên dewleta Tirk a dagirker û hevalbendên wê kir.
Piştre wesîqeya şehadetê ya şehîd Egîd Efrîn hat xwendin û radestî malbata wî hat kirin. Cenazeyê şehîd bi siloganên "Şehîd namirin" û tilîliyên dayikan hat veşartin.
(mh/bb)