‘Çavê me li vegera li Efrînê ye’

Koçberê bi navê Mihemed Ebdo (60) ji navçeya Şera ya Efrînê ye ku heta niha 3 caran koçber bûye.

Mihemed Ebdo li Efrînê debara xwe bi çandiniya zeytûnan dikir, lê piştî koçberiya sala 2018’ an mal û milkên wî jî ji hêla çeteyên dewleta Tirk ve hatine talankirin.

Ebdo dema ji Efrînê koçber dibe, bi traktorê derdikeve û bi rê de bi wî re mazot namîne û gelek zehmetiyan dikişîn. Ebdo got: "Me gelek zehmetî kişandin, lê zehmetiya herî biêş dûrketina ji Efrînê bû. Bi rê de rê de ji ber sermayê gelek kes mirin.”

Ebdo jî berê xwe dide bajarê Til Rifet ê Şehbayê û di nava dorpêç û êrişan de dijî. Li wir gelek zehmetiyan dikişînin lê tenê ji bo vegera li Efrînê li ber xwe didin.

Rêwîtiya duyem a Mihemed a koçberiyê ji Şehbayê bû ku di 2’yê Kanûna 2024`an de berê xwe da Reqayê. Her wiha piştî salekê di 19`Çileya 2026`an de ji ber êrişên hikumeta demkî careke din koçberî herêma Cizîrê bûn.

Di çarçoveya pêkanîna peyama 29`ê Çileyê ya di navbera QSD`ê û hikumeta demkî de, koma yekemîn a koçberan di 9`ê Adarê de ji Hesekê bi rê ket û 10`ê Adarê gihaşt Efrînê. Di koma yekemîn de 400 malbatên ji navçeyên Şiyê, Cindirês û Mabata yên Efrînê bi ewle gihaştin warê xwe.

Koçberên Efrînê yên ku li Cizîrê mane jî dixwazin mîna koma destpêkê vegerin cih û warê xwe. Mihemed di dawiyê axaftina xwe got: "Ez dixwazim vegerim mala xwe. Ez niha 60 salî me, Efrîn her roj, her kêlî di xewn û xeyalên min de ye. Xweşikbûna Efrînê her li ber çavên min e."

ANHA