Bi çalakiyekê xelkê Minbicê banga azadiya Rêber Abdullah Ocalan kir

Xelkê Minbicê ji bo pêkanîna azadiya fîzîkî ya Rêber Abdullah Ocalan çalakiyeke protestoyî li dar xist. Di çalakiyê de Meclisa Perwerdê ya Minbicê daxuyaniyek da, tecrîda li dijî Rêber Abdullah Ocalan şermezar kir û bang li azadîxwazên cîhanê kir ku têkoşîna di oxira pêkanîna azadiya fîzîkî ya Rêber Abdullah Ocalan de mezin bikin.

Çalakî li pêş avahiya Akademiya Şehîd Îsmaîl El Mûsa hate lidarxistin. Di çalakiyê de endamên Meclisa Perwerdê ya Rêveberiya Sivîl a Demokratîk, komîte û saziyên girêdayî wê, endamên meclisên perwerdê yên meclisan, rêxistinên civaka sivîl û Akademiyên Civaka Demokratîk beşdar bûn.

Endama rêveberiya Meclisa Perwerdê Cemîle Îbrahîm daxuyanî xwend. Di daxuyaniyê de tecrîda li dijî Rêber Abdullah Ocalan a ji hêla desthilatên Tirkiye û beşdarbûna hêzên navneteweyî di komploya li dijî wî de hatin şermezarkirin. Her wiha hate gotin Rêber Abdullah Ocalan hewl dide gelan ji nîrê hêzên hegemonîk rizgar bike.

Di dewama daxuyaniyê de bang li tevahî azadîxwazan hate kirin ku tev bigerin û têkoşînê mezin bikin, her wiha bi çalakiyan balê bikişînin ser tecrîdê.

Li herêmên Bakur û Rojhilatê Sûriyeyê, Kurdistan û Rojhilata Navîn têkildarî banga azadiya fîzîkî ya Rêber Abdullah Ocalan çalakiyên girseyî yên gel tên lidarxistin. Bi destpêkirina pêngava cîhanê ya bi diruşma ′Azadî ji Abdullah Ocalan re, Ji pirsgirêka Kurd re çareseriya siyasî′ ku di 10′ê Cotmehê de hatiye destpêkirin tevlêbûn bi awayekî girseyî zêde bû.

(fr)

ANHA