43 welatan li ser avakirina hevpeymaniya ewlehiya deryayî li hev kirin

Wezareta Parastina ya Erebistana Siûdî der barê mijarê de daxuyaniyek weşand.

Di daxuyaniyê de hat diyarkirin ku li paytexta Erebistana Siûdî Riyadê civînek bi beşdariya fermandar û nûnerên 43 welatên, tevî nûnerên Yekitiya Ewropayê hat lidarxistin.

Hate destnîşankirin ku civîn bi armanca xurtkirina tevkariyê di warê ewlehiya rêyên navneteweyî yên deryayî de û rêbazên bersivandina gefên li ser ewlehiya navîgasyonê û bazirganiya cîhanê hat lidarxistin.

Wezaretê daxuyand ku di civînê de gefên li ser ewlehiya deryayan, keştiyên bazirganî, barhilgirên petrolê û binesaziya deryayî, her wiha rêbazên xurtkirina tevkariyê di warê parastina deryayan de hatin gotûbêjkirin.

Li gorî daxuyaniya wezaretê, "Beşdaran reşnivîsa hevpeymaniyê, avahiya wê ya rêxistinî, rêkeftinên li ser rêvebirin û kontrolê, dîsan mekanîzmayên xebata siberojê nîqaş kirin. Armanc ew e ku çarçoveyek sazûmanî ya bi bandor ji bo hevkariyê li hemberî metirsiyên hevpar ên deryayî de were avakirin. Ev çarçove jî herêmên wekî Bab El Mendeb, deryaya Sor û kendava Edenê dihewîne."

Wezaretê diyar kir ku beşdaran li ser temamkirina prosedurên damezrandinê wekî forma dawîn ya peymana hevpeymaniyê, temamkirina avahiyên rêxistinî û amadekariyên teknîkî yên pêwîst li hev kirin.

Hate ragihandin ku di dawiya civînê de Erebistana Siûdî, Kuweyt, Behrêyn, Qeter, Urdun, Misir, Pakistan, Tirkiye, Cîbûtî, Somalî, Bangladeş, Yemen û Komorê jî di nav de 14 welatan daxuyaniyek hevbeş dan û piştgiriya xwe bi hevpeymaniyê re ragihandin. Her wiha hate gotin, deriyê beşdariyê li pêşiya welatên din vekirî ye.

(bb)