3 roj e çalakiya kon a ji bo perwerdeya bi kurdî didome

Çalakiya protestokirinê ya ji bo daxwaza naskirina zimanê kurdî di destûrê de û perwerdeya bi zimanê dayikê ya ku ji 10`ê Îlonê ve ji hêla şêniyên bajarê Dêrikê ya herêma Cizîrê ve dest pê kiriye, di roja xwe ya sêyemîn de didome. 

Konê çalakiyê ji hêla Însiyatîfa Gel a Dêrikê ve li ber Dibistana Yûsif El Ezmê hatiye vedan.

Şêniya bi navê Narinc Hisên di bin konê çalakiyê de got: “Ev xewna me ye, em dixwazin zarokên me bi zimanê kurdî perwerdeya xwe bibînin, dema em xwendekar bûn qedexe li ser zimanê me hebû, dema em bi zimanê xwe diaxivîn em rastî cezakirinê dihatin, ji ber vê yekê em dixwazin zarokên me bi zimanê xwe yê kurdî bixwînin, zimanê me hebûna me ye.”

Narincê ev tişt anî ziman: “Keça min ji qonaxa seretayî ve bi zimanê kurdî perwerdeya xwe dibîne, niha derbasî refên qonaxa navîn bûye, wê çawa karibe bi zimanekî din perwerdeya xwe bibîne?”

Narincê wiha li axaftina xwe zêde kir: “Heta zimanê me neyê naskirin em ê çalakiya xwe ranawestînin, ew zimanê me yê dayikê û hebûna me ye, em nahêlin zarokên me bi zimaneke din perwerdeya xwe bibînin, em ê ji bo zimanê dayikê asta têkoşîna xwe bilindtir bikin.”

Şêniya bi navê Safya Îbrahîm jî got: “Heta naskirineke temamker bi zimanê me neyê kirin, em ê çalakiya xwe nesekinîn. Piştî têkoşîneke dirêj a di şoreşê de û keda bi hezarên şehîdan, em ê çawa dest ji zimanê xwe berdin? Ev mijar bi temamî nayê qebûlkirin, em ê heta ku naskirinek bi hemû mafê me yê zimanî neyê, em ji bin kon dernakevin.”

Xwendekara ku cihê xwe di çalakiyê de digire Şêrîn Xelîl jî got: “Em ji bo parastina mafê gelê xwe û naskirina bi zimanê me ya di nava Sûriyeya nû de di bin vî konî de ne, heta niha em derbasî dibistanê nebûne, em heta ku zimanê kurdî nebe zimaneke fermî li herêmê ji qadan venakişin.”

(sb)

ANHA