Yekitiya Ajokaran 60 otobus şandin Helebê

Ev 3 roj e çeteyên Heyet Tehrîr El Şam ên girêdayî dewleta Tirk a dagirker êriş gundewarên Helebê dike û bi dehan gund û bajarok kontrol kirin.

Li gorî agahiyan, di êrişa çeteyan a li ser wargeheke xwendekarên Zanîngeha Helebê de 4 xwendekar hatin kuştin û hinek jî birîndar bûn.

Li ser banga xwendekaran û şêniyên li Helebê, Yekitiya Ajokaran a Kantona Reqayê 60 otobus ber bi Helebê ve bi rê kirin. Wek beşa yekemîn 45 kes bi rêya otobusan ji Helebê gihaştin Reqayê.

Hevserokê Yekitiya Ajokaran a Reqayê Wedah El Cerîcb der barê mijarê de ev agahî dan ajansa me: "Li ser banga xwendekaran me yekser otobus amade kirin. Me 60 otobus ji Reqa, Sehel û Mensûrayê ji bo anîna xwendekar û şêniyan şandin Helebê. Otobus saet 02:00ˈan ji Reqayê derketin û niha li geraca Şear a bajarê Helebê ne."

Wedah El Cerîcb diyar kir ku ji bo vegera li Herêma Bakur û Rojhilatê Sûriyeyê, hemahengî di navbera wan û xwendekar û şêniyên li Helebê de heye.

Rêveberiya Xweseriya Demokratîk jî bang li tevahî saziyên xwe kir ku derbasbûna şêniyên ji Helebê tên, hêsan bikin.

(bb)

ANHA