Têkildarî hişê çêkirî li Hesekê komxebatek hat lidarxistin

Nivîsgeha Ciwanan a Partiya El Wetan a Sûriyeyê, bi mijara hişê çêkirî, bandor û encamên ku jê tên li navenda xwe ya li bajarê Hesekê bi beşdariya hejmareke ciwanan, xwendekarên zanîngehan û endamên partiyê komxebatek li dar xist.

Komxebat bi belavkirina anketên girêdayî nêrîna têkildarî hişê çêkirî û bikaranînên wê dest pê kir.

Pispora xebatên hişê çêkirî Rama Hisên bernameyên di vê qadê de tên bikaranîn dan pêşandan, erk û mekanîzmaya sûdwergirtina jê bi awayekî rast a ji bo projeyên elektronîk şîrove kir.

Rama Hisên got: “Hişê çêkirî bi awayekî temamker şûna mirovan nagire, rola mirovan ji bo anîna agahiyan û pêşkêşkirina encaman dimîne ya esasî, mirov dikare li gorî hacetên xwe tiştan bi kar bîne û bi şêwazeke erênî sûdê jê wergire.”

Rama Hisên behsa zagonên girêdayî bikaranîna hişê çêkirî bi şêweyekî herî baş kir, her wiha bal kişand ser girîngiya pirsîna pirsên zelal û diyar kir ku nabe mirov wê wekî jêdereke bi tenê ji bo lêkolînê û girtina agahiyan bi kar bîne.

Rama Hisên destnîşan kir hişê çêkirî ne dûrî pêkanîna şaşiyan, bi taybet di mijarên lêkolîn, zanistî, akdemîk û dîrokî de, ji ber vê yekê divê mirov li cihekî din agahiyên xwe piştrast bike.

Komxebat bi nîqaşan bi dawî bû.

(sb)

ANHA