Şêx Murşîd El Xeznewî bi xelkê Amûdê re civiya

Şêx Murşîd El Xeznewî jî bang li partiyên kurdî kir ku daxwaza gel a tifaqê bi cih bînin. Her wiha banga xwedîderketina li QSDˈê kir.

ROJANE

30 kanûn, 2024 15:46

QAMIŞLO

Şêx Murşîd El Xeznewî ku civînên xwe li Herêma Bakur û Rojhilatê Sûriyeyê didomîne, îro bi şêniyên bajarê Amûdê re civiya.

Civîn li Stadyuma Şermola bi beşdariya bi hezaran şêniyên bajar û gundên Amûdê hat lidarxistin.

Piştî deqeya rêzgirtinê Murşîd El Xeznewî axivî û bal kişand ser girîngiya avakirina yekitiya neteweyî ya kurdî û got: "Pirsgirêka Kurd pirsgirêka me ya sereke ye. Tevahî gelê Kurd Kurdistaneke azad dixwaze. Lewre divê gelê Kurd û partiyên siyasî bi berpirsyarî tev bigerin."

Şêx Murşid El Xeznewî bang li tevahî Kurdan kir ku piştgiriyê bidin QSDˈê, her wiha bang li partiyên kurdî kir ku daxwaza gel a tifaqê bi cih bînin û pirsgirêka Kurd çareser bikin.

Şêx Fehed Mehmûd jî bal kişand ser nûçe û îdiayên derew ku çapemeniya dewleta Tirk a dagirker parve dike û bang li şêniyên kir ku guh nedin van îdiayan. Şêx Fehed Mehmûd bi domdarî got: "Em xwedî hêzeke mezin in ku em dikarin di muzakereyên siberojê de bi kar bînin."

Di dawiya civînê de dirûşmên "Bijî yekitiya gelê Kurd" hatin berzkirin.

(bb)

ANHA