Şehîd Hogir li Şedadê hat oxirkirin

Şervanê QSD’ê yê şehîd Ebdulkerîm Ehmed El Dawud bi merasîmekê bi Pakrewangeha Şehîdan a Şedadê hat oxirkirin.

ROJANE

1 cotmeh, 2024 15:14

HESEKÊ

Bi sedan şêniyên bajarê Şedadê cenazeyê şervanê QSD’ê Hogir (Ebdulkerîm El Dawud) bi merasîmekê li Pakrewangeha Şehîdan a bajêr spart axê.

Merasîmê bi rêzgirtinê û torana leşkerî dest pê kir. Piştre endamê Melisa Malbatên Şehîdan a Şedadê Mihemed El Xelîl axivî.

El Xelîl di destpêka axaftina xwe de sersaxî ji malbat û hevalên şehîd re xwest û got: "Şehîd di rêya avakirina civakeke demokratîk de canê xwe didin. "

Berdevkê Meclisa Leşkerî ya Şedadê Mihemed El Ferec jî di axaftina xwe de da zanîn ku şehîd Ebdulkerîm erka xwe ya pîroz a parastina gel û xaka xwe bi cih anî û tev li karwanên nemiran bû.

El Ferce soz da ku dê xwedî li destkeftiyên şehîdan derkevin û ji bo pêkanîna xeyalên wan tê bikoşin.

Piştî axaftinan wesîqeya şehîd hat xwendin û radestî malbata wî hat kirin. Cenazeyê şehîd bi tîlîliyên dayikan û dirûşmên dilsoziya bi şehîdan re hat veşartin.

Şervanê QSD’ê Hogir (Ebdulkerîm El Dawud) 28’ê Îlonê dema erka xwe bi cih dianî, li bajarokê Bisîra yê Dêrazorê şehîd bûbû.

(bb)

ANHA