Partiya Sûriyeya Pêşerojê: Em ji mafên xwe nayên xwarê

Ji bo gotûbêjkirina geşedanên dawîn ên siyasî yên li Sûriyeyê, Partiya Sûriyeya Pêşerojê îro li bajarê Til Birakê yê kantona Cizîrê civîneke gel li dar xist. Şênî û rûspiyên bajêr û endamên saziyên sivîl û partiyên siyasî beşdarî civînê bûn.

Civînê bi deqeyeke rêzgirtinê dest pê kir, piştre endamê Meclisa Giştî ya Partiya Sûriyeya Pêşerojê Cahid Hesen axivî û geşedanên siyasî nirxandin. Hesen der barê planên dewleta Tirk a dagirker de ku dixwaze kontrola xwe li ser deshtilatdariya Şamê ferz bike, hişyarî da û diyar kir ku armancên dewleta Tirk ew e ku projeya xwe ya dagikeriyê pêk bîne û di navbera pêkhateyên Sûriyeyê de tevliheviyan çêke.

Hesen her wiha tekez kir ku ew wek partî piştevaniya her destpêşxeriyekê dikin ku bibe sedema rawestandina rijandina xwîna sûriyeyiyan û bidawîkirina krîza Sûriyeyê. Her wiha got: "Em wek Partiya Sûriyeya Pêşerojê, piştgiriyê didin çareseriyên ku dadmendî û wekheviyê misoger dikin, lê eger hewldanek ji bo paşguhkirina pêkhateyên herêmê hebe em ê têkoşîna xwe bidomînin."

Hesen destnîşan kir ku gelên Bakur û Rojhilatê Sûriyeyê ji bo azadî û aramiyê bi hezaran şehîd dane û fedakariya wan dê vala neçe. Her wiha berxwedana gel û hêzên leşkerî yên li bendava Tişrînê û hemû eniyên şer bilind nirxand û tekez kir ku sekna gelêrî û leşkerî ew e keleha asê ye li hember her planên êrişkar.

Di dawiya civînê de beşdarên civînê nêrîn û pirsên xwe der barê siberoja herêmê de anîn ziman.

(k)