MSD’ê daxwaza garantîkirina siberoja Zanîngeha Rojava kir

Meclisa Sûriyeya Demokratîk (MSD) nerazîbûna xwe ji ber bikaranîna bombeyên gazê li Zanîngeha Rojava anî ziman û daxwaza diyalogê di navbera Wezareta Xwendina Bilind, rêveberiya zanîngehê û xwendekaran de kir.

MSD’ê daxwaza garantîkirina siberoja Zanîngeha Rojava kir
17 mijdar, 2026   11:02
NAVENDA NÛÇEYAN

MSD`ê îro der barê Zanîngeha Rojava û siberoja perwerdeyê ya li Sûriyeyê de daxuyaniyek weşand. MSD`ê diyar kir ku ew rûdanên li Zanîngeha Rojava ya li Qamişloyê û xwepêşandanên xwendekaran û aloziyên li zanîngehê çêbûn, ji nêz ve dişopîne.

Daxuyaniya MSD`ê destnîşan kir ku "Zanîngeha Rojava ezmûneke akademîk e ku di şert û mercên awarte de hatiye avakirin û bûye egera peydakirina derfetên xwendina bilind ji bo bi hezaran xwendekaran. Ew her wiha bi ezmûneke perwerdehî, çandî û zimanî ve girêdayî ye ku hêjayî nirxandin, pêşxistin û bikaranîna di çarçoveya avakirina pergala xwendina bilind de li Sûriyeyê ye. Ji ber vê yekê, divê siberoja wê bi helwesteke neteweyî ya berfireh were nirxandin, ne tenê ji aliyê girêdayîbûna îdarî ve."

MSD`ê her wiha diyar kir ku "zimanê Kurdî, mîna Erebî û hemû zimanên din ên civaka Sûriyeyê, beşeke pirrengiya çandî û neteweyî ye û garantîkirina mafê perwerdeyê bi zimanê kurdî û pêşxistina hebûna wî di saziyên akademîk de, divê beşeke polîtîkayên perwerdeya neteweyî be."

Di daxuyaniya MSD`ê de ev daxwaz hatin rêzkirin:

“Diyalogeke cidî û berpirsiyar di navbera Wezareta Xwendina Bilind, rêveberiya Zanîngeha Rojava, endamên fakulteyê û xwendekaran de ji bo gihîştina lihevkirineke ku siberoj û rewşa akademîk a zanîngehê garantî dike, were pêkanîn.

Pêşxistina planeke zelal ji bo berdewamî û pêşveçûna hemû fakulte û pisporiyan, misogerkirina mafên xwendekarên niha û yên siberojê.

Misogerkirina naskirina akademîk a bawername û sertîfîkayan û çareserkirina rewşa xwendekarên ku bi rêya pêvajoya pejirandinê ya zanîngehê hatine ragihandin, bi vî awayî salên xwendinê û siberoja wan a akademîk biparêzin.

Parastina mafên zimanî û çandî di nav pergala perwerdeya neteweyî de û garantîkirina mafê perwerdeya bi zimanê Kurdî û pêşketina wê di hemû ast û qonaxên akademîk de.

Rêzgirtina li serxwebûna xebata akademîk û pîroziya zanîngehan û pejirandina diyalog û lihevhatinê bo çareserkirina nakokiyan, dûrketina ji karanîna hêzê an ferzkirina biryarên yekalî.

(k)

ANHA