Li Viyanayê 69 şehîdên Kobanê hatin bibîranîn

Li ser vexwendina "Komuna Şehîdan" a li Awistiryayê, îro li navenda "Komela Kurdan" ya li Viyanayê merasîmek ji bo bîranîna 69 şehîdên Kobanê hate lidarxistin. Malbatên şehîd Viyan Kobanê, Xûnev Kobanê, Bêrîtan Kobanê û Melîtan Kobanê beşdarî merasîmê bûn. Merasîm bi deqeyek rêzgirtinê ji bo şehîdên azadiyê dest pê kir.

Piştre, endamê Komîteya Rêxistinê ya Partiya Yekitiya Demokratîk (PYD) li Awistiryayê Hamî Hecî Elî axivî. Hamî Hecî Elî, bi xêr hatina beşdaran kir û pabendbûna wan a şopandina ala şehîdan ji bo bidestxistina armancên xwe piştrast kir.

Hamî Hecî Elî anî ziman ku gelê Kurd deyndarê qurbaniyên xwe ye û dê ji bo şehîdên ku ji bo rûmeta gelê Kurd canê xwe dane wisa bimîne.

Nûnerê "Komuna Şehîdan" Ehmed Zîrek jî behsa mezinbûna şehîdan û rola wan a bingehîn di bilindkirina ala azadiyê de kir.

Zîrek behsa yekitiya gelê Kurd kir ku bi saya xwîna şehîdan hatiye bidestxistin û got, yekitiya di navbera Kurdan de tenê rêya têkbirina hemû polîtîkayên li dijî gelê Kurd hatine plankirin e.

Zîrek bal kişand ser rola girîng a malbatên şehîdan di xurtkirina rêzan û bilindkirina têkoşîna ji bo jiyana bi rûmet û azad li ser welatê xwe.

Çalakvan Agirî Kobanê jî li ser navê Tevgera Jinên Kurd a li Viyanayê axivî, şehîdan bi bîr anî û got, "Em deyndarê şehîdan in ku em gihîştine vê qonaxê."

Agrî Kobanê axaftina xwe bi piştrastkirina ku malbatên şehîdan û welatparêzên li Viyanayê di parastina rêya şehîdan û pêkanîna xeyalên wan de roleke girîng dilîzin, bi dawî kir.

Di heman çarçoveyê de, rojnamevan û siyasetmedar Bunyad Cizîrî axivî û wiha got: “Du roj berê, bajarê berxwedanê, Kobanê, şahidiya bîranîna komek şehîdên azadiyê kir, ku di nav wan de hejmarek şehîd ji civaka Ereb jî hebûn. Îro, em bîranîna van 69 şehîdan, bi taybetî Viyan Kobanê, Xanef Kobanê, Berîtan Kobanê û Melîtan Kobanê, bi rêzdarî dinirxînin.

Bi vê boneyê, em soza xwe nû dikin ku heta ku em bigihîjin armancên ku hevalên me yên şehîd canê xwe ji bo wan feda kirine, têkoşînê bidomînin.”

Cizîrî bal kişand ser destkeftiyên ku bi saya fedakariya şehîdan li Kurdistanê hatine bidestxistin û got ku parastina van destkeftiyan li ser me hemûyan e.

Piştre axaftina Murat Karayilan der barê şehîdên Kobanê de, digel wêneyên şehîdan, hate nîşandan.

Malbatên şehîdan jî di axaftinên xwe de qurbaniyên xwe bi bîr anîn, serbilindiya xwe bi şehîdan û pabendbûna xwe bi nirx û prensîbên ku wan jiyana xwe ji bo wan dane piştrast kirin û soz dan ku heta ku hêvî û armancên wan pêk werin, têkoşînê bidomînin.

Nîhad Misî Ebû Mezlûm, bavê şehîd Viyan Kobanê jî axivî û serbilindiya xwe bi şehîdan anî ziman. Nîhad Misî Ebû Mezlûm, tekez kir ku bîranîna keça wî ya şehîd Viyan bîranîna hemû şehîdên ku jiyana xwe ji bo doza gelê xwe dane ye. Her wiha soza berdewamiya li ser rêya wan da û tekez kir ku şehîd şehîdên Kurdistanê ne.

Li ser navê malbata şehîd Milîtan Kobanê Arif Bîşo jî got, şehîd dê bibin mînakên rolê ku nifş dê ji wan îlhama fedakarî û dilsoziyê bistînin, û rêya ku wan ji bo parastina gelê xwe û doza xwe hilbijartiye bidomînin.

Mihemed Bozan jî li ser navê malbata şehîd Bêrîtan Kobanê axivî û rêz li şehîdan û Rêber Apo girt û bal kişand ser tevkariyên şehîdan ji bo doza gelê Kurd.

Li ser navê malbata şehîd Xûnev Kobanê Hemze Heyder axivî û diyar kir ku ew ê bi israr têkoşînê bidomînin, li ser rêya şehîdan pabend bin, ji bo bidestxistina hêvî û armancên wan bixebitin û dilsozê qurbaniyên ku ji bo azadî û mafên gelê xwe dane bimînin.