Li Şehba, Qamişlo û Helebê şehîd Zîlan hat bibîranîn

Bi boneya salvegera şehadeta şehîd Zîlan li bajarê Qamişlo, kantona Efrîn û Şehba û Helebê ji aliyê Kongra Star ve meş hatin lidarxistin.

QAMIŞLO

Bi pêşengtiya Kongra Star jinên Til Hemîs, Amûdê, Tirbespiyê û bajarê Qamişlo li çarxereya Osman Sebrî ya li bajêr kom bûn û ji bo bîranîna Şehîd Zîlan meşek li dar xist.

Beşdaran di meşê de alên Kongra Star, wêneyên şehîd Zîlan û şehîdên jin hildan û ber bi Navenda Mihemed Şêxo ya Çand û Hunerê ve meşiyan.

Li pêşiya Navenda Mihemed Şêxo endama rêveber a Kongra Star Şaha Xelîl axivî.

Şaha di despêka axaftina xwe de şehîd Zîlan û hemû şehîd bi bîr anîn û wiha got: ''Şehîd Zîlan ji bo ku xeta azadiya jin biparêze û xwedî li fikir û felsefeya Rêber APO û li xaka xwe, gelê xwe xwedî  derkeve, di 1996'an de li bajarê Dêrsimê li hember dewleta Tirk çalakiya fedaî pêk anî."

Meş bi diruşma ''Jin, Jiyan, Azadî'' bi dawî bû.  

ŞEHBA

Şehîd Zîlan (Zeyneb Kinaci) 30`yê Hezîrana 1996`an li bajarê Dêrsimê yê Bakurê Kurdistanê li dijî leşkerên Tirk çalakiyeke fedaî li dar xist. Kongra Star a kantona Efrîn û Şehba ji bo bîranîna şehîd Zîlan meşek li dar xist.

Bi sedan jinên Efrîn û Şehba û nûnerên saziyên Rêveberiya Xweser beşdarî meşê bûn. Meş bi diruşma "Bi rihê fedaîtiya şehîdên Hezîranê em ê azadiya Rêber Apo misoger bikin" ji destpêka bajarokê Ehrezê dest pê kir û heya nava bajarokê Ehrezê çû. Di meşê de weneyên Rêber Abdullah Ocalan, şehîd Sema û şehîd Zîlan hatin hildan.

'EM ŞOPDARÊ RÊYA ŞEHÎD ZÎLAN IN'

Li qadê endama Koordansyona Kongra Star a kantona Efrîn û Şehba Ferîde Îbo axivî û di şexsê şehîd Zîlan de tevahî şehîdên Kurdistanê bi bîr anîn û wiha got: "Şehîd Zîlan roja 30' ê Hezîranê kir roja binketina dewleta Tirk. Bi çalakiya şehîd Zîlan re bi sedan Zîlanan soza şopandina rêya şehîdan dan. Şehîd Zîlan ji bo komploya li ser Rêber Apo bişikîne canê xwe feda kir. Heya vê kêliyê jî em li ser xeta şehîd Zîlan têkoşîn dikin."

'ÇALAKİYA ŞEHÎD LI HEMBER TECRÎDÊ BERSIVA HERÎ XURT BÛ'

Ferîde axaftina xwe wiha berdewam kir: "Çalakiya şehîd Zîlan ji bo jinan bû rêya ronahiyê. Çalakiya şehîd Zîlan li hember dijmin û tecrîda li dijî Rêber Abdullah Ocalan bû bersiva herî xurt."

Ferîde Îbo axaftina xwe wiha bi dawî kir: "Em soz didin şehîdên xwe û şehîd Zîlan em ê têkoşîna xwe xurttir bikin. Em ê her tim ji bo azadiya fizikî ya Rêber Apo li qadan bin."

Her wiha endama Meclisa Malbatên Şehîdan a kantona Efrîn û Şehba Emel Şêxo axivî û got: "Şehîd Zîlan û tevahî şehîden Kurdistan ji bo azadiya Kurdistan û tevahî gel canê xwe feda kir. Em ê jî xwedî li keda wan derkevin û şopdarê rêya şehîdên xwe bin."

HELEB

Bi sedan xelkê taxên Şêxmeqsûd û Eşrefiyê yên Helebê, nûnerên saziyên sivîl û partiyên siyasî li pêş hola 8ˊê Adarê kom bûn û beşdarî meşê bûn. Kongra Star ji bo bîranîna şehîd Zîlan û Sema meşek organîze kir.

Meş li kolanên taxa Şêxmeqsûdê heta bi Çerxerêya Gulê Selmo dest pê kir.

Di meşê de endama rêveber a Akademiya Star Mune Kubik axivî û bal kişand ser çalakiya fedaî ya şehîd Zîlan  û wiha got: "Ew sembola azadiyê ye. Bi çalakiya xwe ya fedaî bersiv da dagirkeriya Tirk."

Mune wiha domand: "Şehîd Zîlan rêça azadî û rastiyê hilbijart. Bi çalakiya xwe ya fedaî mohrek danî û heta niha ji bo bi hezaran jinan ronahiyek e."

Her wiha endama Koordînasyona Kongra Star Fercîn Mihemed axivî û got: "Em ê bi ruhê şehîd Zîlan tevahî bendan ji Îmraliyê heta bi çiyayên Kurdistanê bişikînin."

Di dawiyê de koma şehîd Delîla ya Tevgera Hîlala Zêrîn stran pêşkêş kirin.

ANHA