Li Qamişlo êriş û komkujiyên li Dêrazorê hatin şermezarkirin
Di meşa li dijî êrişên li ser Dêrazorê de ji hêla koma Dîfa El Wetenî ya girêdayî hikumeta Şamê ve xelkê Qamişlo diyar kir ku Rêveberiya Xweser îsbat kir ku Herêma Bakur û Rojhilatê Sûriyeyê herêmeke ewle ye û hewldana derxistina fitneyan bi ser nakevin.
Bi sedan xelkê bajarê Qamişlo ji bo şermezarkirina êriş û komkujiya ku çekdarên koma Dîfa El Wetenî ya girêdayî hikumeta Şamê li gundewarê rojhilatê Dêrazorê pêk aniye, meşek li dar xist.
Girse ji pêş ˊDermanxaneya Dehamˊ a li taxa Kornîş kom bûn û ber bi avahiya Komîseriya Penaberan a NYˊyê ya li Qamişloyê ve çûn. Di meşê de wêneyên şehîdên komkujiyê hatin hildan.
Li wir, li ser navê Meclisa Rûspî û Eşîrên Ereb şêxê qebîleya Tey Hesen Ferhan Ebdurehman axivî.
Şêx Hesen Ebdurehman axivî û got: "Beriya dewlet bên avakirin, em civakî ne. Tiştên dewletên dijber li Sûriyeyê dikin kiryarên dermirovî ne. Tu kes nikare li ser welatparêziya me biaxive, beriya em Kurd, Ereb, xiristiyan û êzidî bin, em Sûriyeyî ne."
Ebdurehman wiha domand: "Rêveberiya Xweser ji Rojhilata Navîn û cîhanê re îsbat kir ku Bakur û Rojhilatê Sûriyeyê herêmeke ewle ye. Hin hewldanên binketî yên derxistina şerê eşîrên Ereb li dijî QSDˊê û derxistina fitneyan hene."
Ebdurehman wiha dawî li gotina xwe anî: "Em Kurd, Ereb û xiristiyanên li herêmê derxistina fitneyan qebûl nakin."
Meş bi diruşmên ˊŞehîd namirinˊ ûˊBijî berxwedana gelan, bijî berxwedana QSDˊêˊ bi dawî bû.
(fr)
