Li Humsê li dijî bilindkirina bihayê kehrebeyê xwepêşandan

Nûçegihana me ji bajarê Humsê da zanîn ku bi dehan welatî û çalakvanên sivîl li pêşiya avahiya parêzgeriya Humsê xwepêşandan li dar xist. Welatiyan bi xwepêşandanê nerazîbûna xwe li hemberî biryara hikumeta veguhêz a Sûriyeyê ya zêdekirina bihayê kehrebeyê nîşan da.

Xwepêşandêran pankartên "Kehrebe maf e ne bazirganî ye", "mûçeya min tune ye, ez ê çawa bidim", "Wezaret qezenc dike û welatî birçî dibe" û gotinên din ên ku êşên welatiyan derdibirînin, hatin hildan.

Xwepêşandêrekî got ku beşdariya wî hevgirtina bi zehmetiyên welatiyan re ye û ev biryar, li şûna alîkariya mirovan di başkirina rewşên wan de bike, hê barê welatiyan giran dike û jiyana wan a rojane xerabtir dike.

Xwepêşandêran banga destwerdanê lezgîn ji bo betalkirina vê biryarê ku ne li gorî rewşa aborî û debarê ya li herêmên di bin kontrola hikumeta veguhêz de ye, kir û aşkera kir ku ev zexteke mezin li ser welatiyan çêdike û derbeke tund li dijî civakê ye.

Hikumeta veguhêz biryara bilindkirina bihayê kîlowata kehrebeyê ji 10 lîre heta 600-1400 lîreyan dabû.

Rêjeya mehane ya kehrebeya ku her malek bi kar tîne nêzî hezar kîlowat e, anku fatûreya mehane zêdetirî mîlyon û 400 hezar lîreyê ye. Hemwextî wê mûçeya herî kêm li herêmên hikumeta veguhêz a Sûriyeyê 750 hezar lîre ye.

Ji bo nîşandana nerazîbûnê li hemberî vê biryarê gelek saziyên berhemdar û şîrket rawestîn û karmendên xwe jî dan rawestandin.

(mh/fr)