Li Dêrikê têkildarî yekrêziya Kurdî civîn

MSDˋê li bajarê Dêrikê ji bo nîqaşkirina nêrîna xwe ya têkildarî Sûriyeya pêşerojê civînek li dar xist.

28 kanûn, 2024 18:51

QAMIŞLO

Civîn li hola Şînav a Dêrikê bi beşdariya kesayetên welatparêz, partiyên siyasî, rûspiyên eşîran û rewşenbîrên bajêr hat lidarxistin.

Di civînê de hevserokê Nivîsgeha Têkiliyan a Meclisa Sûriya Demokratîk (MSD) Hesen Mihemed Elî axivî. Elî bal kişand ser rewşa Sûriyeyê û got: "Dewleta Tirk bi hemû rê û rêbazan hewl dide hebûna gelê Kurd ji holê rake."

Elî wiha domand: "Kobanê sembola berxwedanê ya vê hebûnê ye. Divê bala her kesî li ser vê berxwedanê bê kişandin."

Elî diyar kir ku divê helwesteke yekgirtî bê girtin û ji bo berjewendiya vî gelî berê xwe bidin Şamê.

Elî bang kir ku nakokiyên xwe bidin aliyekî û bi armancên vî gelî bifikirin.

Di civînê de beşdaran diyar kir ku pêwîstî bi yekrêziya lez a Kurdan heye ku tevahî planên qirkirina gelê Kurd bên têkbirin.

Di dawiya civînê de teqezî bi girîngiya yekrêziya Kurdî, banga lidarxistina kongreyeke Kurdî bi armanca parastina destkeftiyên gel li Bakur û Rojhilatê Sûriyeyê û sekna li kêlek QSDˋê hat dayîn.

(fr)

ANHA