Li bajarê Hamburgê ya Almanyayê çalakiyên piştevaniyan Roajva didomin

Bi banga Meclîsa Gelê Kurd a Demokratîk a Hamburgê, li ber Hauptbahnhofê mîtîngek bi beşdariya bi sedan kesan hat li dar xistin. Di mîtîngê de êrîşên li ser Rojava û Bakur û Rojhilatê Sûriyeyê hatin protestokirin.

12 sibat, 2026 23:56

NAVENDA NÛÇEYAN

Meclîsa Gelê Kurd a Demokratîk a Hamburgê, ji bo protestokirina êrîşên komên hikumeta demkî û komên çekdar ên bi piştgiriya Tirkiyeyê yên li ser Rojava û Bakur û Rojhilatê Sûriyeyê, li ber Mediamarkt a Hamburg Hauptbahnhofê mîtîngek li dar xist.

Di çalakiya ku bi sedan kes beşdar bûn de; Meclîsa Jinê ya Rojbîn, TCŞ, enternasyonalîstên Elman, rêxistinên jinan ên çep û sosyalîst û Kurdistanî cih girtin.

Di qada mîtîngê de pankartên bi nivîsa “Türkischen Angriffskrieg und Dschihadisten stoppen! Verteidigt Rojava und die Frauenrevolution!”, “Stoppt die Angriffe auf Rojava und Rojhilat, Solidarität mit den Protesten im Iran!” û “Wir sind bereit, uns denen entgegenzustellen, die uns unsere Freiheit nehmen wollen!” hatin vekirin. Li gel alayên TEV-DEM û Kurdistanê, dowîzên ku balê dikişandin ser êrîşên HTŞ’ê hatin hilgirtin.

Çalakî bi deqeyeke rêzgirtinê ji bo bîranîna şehîdên Kurdistan û şoreşê dest pê kir. Di dema çalakiyê de sloganên “Jin Jiyan Azadî”, “Terorîst Colanî, Terorîst Erdogan”, “Bijî Berxwedana Rojava”, “Alle zusammen gegen den Faschismus” û “Bijî Berxwedana YPG-YPJ” hatin berzkirin û marşên berxwedanê hatin lêxistin.

Di dawiya mîtîngê de banga beşdariya meşa navendî ya 14’ê Sibatê hat kirin, ku wê li Strasbourgê bi dirûşma “Ji Rêber Apo re Azadî, ji Rojava re Statû” bê li dar xistin.