Kongreya Îslama Demokratîk bi şêniyên Dirbêsiyê re civiya

Kongreya Îslama Demokratîk a bajarê Dirbêsiyê yê kantona Cizîrê bi şêniyan re civiya û nêrîna xwe ya siyasî û olî der barê siberoja Sûriyeyê de şîrove kir. Civîn li hola Navenda Çand û Hunerê ya bajêr hate lidarxistin. Şênî, endamên saziyên sivîl û meclisên xwecih, tev li civînê bûn.

Endamê rêveber ê Kongreya Îslama Demokratîk a kantona Cizîrê Mihemed El Izo civîn birêve bir û destnîşan kir ku kongre xwe dispêre, raman û felsefeya Rêber Abdullah Ocalan û diyar kir ku bingeha rêgezên wî azadiya jinan, wekhevî, jiyana hevbeş û demokrasî ne yên ku îslam jî banga wê dike.

Endamê rêveber ê nivîsgeha Rêveberiyê û Birêxistinkirinê yê Meclisa Hesekê Mistefa Ebdo jî nêrîna siyasî û olî ya kongreyê xwend.

Xalên sereke yên nêrînê ev in: divê piştgiriya lihevhatinê li ser bingeha rastiyê, edaletê û naskirina pêkhateyên din, bê kirin. Divê komîteyên taybet ên lihevhatinê yên xwecih bên avakirin ku endamên wê nûnerên pêkhateyên olî bin (elewî, xiristiyan, dûrzî), divê diyalog di navbera ol û mezheban de bê xurtkirin, taybetmendiyên hev du nas bikin, komxebatên asayî ji oldaran re li dar bixin. Nûnertiya jinan di meclisên qanûnsaz û rêveberî de dabîn bin, amadekirina metaryalan li gorî rêgezên olî yên ku bingeha wê edalet, pirrengî, şûra û merhemet be. Divê girîngiyê bidin dîroka jiyana hevbeş a li Sûriyeyê, ciwan û jin bên xurtkirin û tev li jiyana olî, civakî û biryargirtinê bibin. Divê çavdêriya xîtabê olî bê kirin û wê ji olperestî û taîfiyetê dûr bixin. Xwe bispêrin, xîtabeke olî ya nîştimanî û hevgirtî. Divê xwedî li pergaleke nenavendî derkevin ku mafên destûrî yên pêkhateyan dabîn dike.

Endama rêveber a Nivîsgeha Jinan a Hevgirtina Al El Beyt Xilûd Al Îsa erkên hevgirtinê diyar kir û got bingeha xebatên hevgirtinê, xurtkirina nirxên îslama nerm, belavkirina zanistê, parastina yekitiya neteweyê, redkirina parçekirinê, piştgiriya jiyana hevbeş û aştiyê di navbera pêkhateyan de û tev li pêvajoya siyasî bibe.

Di dawiya civînê de, teqezî bi xurtkirina xebatên Kongreya Îslama Demokratîk li Sûriyeyê û belavkirina têgehên îslama nerm, hate kirin.

(şx)

ANHA