Koçberên vegeriyane Efrînê wêrankirina malên xwe belge dikin

Di çarçoveya bicihanîna peymana 29'ê Çileyê ya di navbera QSD û hikumeta demkî ya Sûriyeyê de, di 9`Adarê de koma yekemîn a koçberên ji Efrînê yên li herêma Cizîrê ber bi warê xwe bi rê ket û di 10`ê Adarê de gihaşt Efrînê. Ev kom ji 400 malbatan ji navçeyên Şiyê, Mabeta û Cindirêsê bûn.

Malbateke ku bi koma yekem re vegeriyaye, ji bo ewlehiya xwe nexwestin navên wan werin aşkerakirin, bi dîmenan talankirin û wêrankirina malên xwe belge kir.

Malbat ji navçeya Mabeta ya Efrînê ye. 2 malên wan hene, yek li bajarê Efrînê û ya din jî li gund e. Her du malên wan di destê malbatên çeteyan de bûn. Lê belê wekî ku di dîmenan de jî diyar dibe, mal hatiye talankirin û tevahî keblên kehrebeyê, pencere û derî hatine dizîn. Di malê de tenê gemar li şûna xwe hiştine.

Ne tenê xaniya vê malbatê wisa ye, di gelek xaniyan de hîna malbatên ji Xota, Idlib û cihên din li Efrînê hene û xaniyên şêniyan vala nekirine. Malên ku vala jî dibin, her tiştekî tê de bi xwe re dibin û malê gemar dikin û diçin.

Hê jî gelek koçberên ji Efrînê yên li herêma Cizîrê û Kobanê li benda vegera li cih û warên xwe ne.

(zş)

ANHA