Jin li Helebê piştgiriya pêngava azadiyê kir

Di çarçoveya pêngava “Ji Rêber Abdullah Ocalan re azadî û ji pirsgirêka Kurd re çareseriya siyasî” de gelek jinan li taxên Şêxmeqsûd û Eşrefiye yên Helebê gotin divê tecrîd bi dawî bibe û azadiya fîzîkî ya Rêber Abdullah Ocalan pêk were.

Welatiya bi navê Kîfa Yihya got: “Hebûna Rêbertî di nav me de dê moralên me bilind bike û vîna me xurttir bike. Nemaze di vê pêvajoyê de ku dewleta Tirk a dagirker êriş dike û gelek pirsgirêkên civakî hene. Em tev li mîna van çalakiyan dibin da ku vê armancê pêk bînin.”

Kîfa wiha domand: “Ev pêngav ji bo me firsendek e. Qene em e beşeke biçûk ji qenciya bi me kirî ji Rêbertî re vegerînin. Piştevaniya jinan kir û ji bo ku azad bibin, tê koşiya.”

Welatiya bi navê Mîdya Mislim jî wiha axivî: “Azadiya me bi azadiya fîzîkî ya Rêbertî ve girêdayî ye. Ev pêngav dê vê armancê pêk bîne.”

Welatiya bi navê Necla Hemze jî got: “Em piştgiriya pêngava cîhanê ya ji bo azadiya Rêbertî dkin. Bi rêya wê pêngavê em ê dengê xwe bigihînin cîhanê û aliyên têkildar ji bo ku sûcên dewleta Tirk a faşîst ên li dijî Rêberê me dike, rawestînin.”

Pêngava cîhanê ya ji bo azadiya fîzîkî ya Rêber Abdullah Ocalan li 74 navendên li seranserî cîhanê 10`ê Cotmehê bi dirşûma “Ji Abdullah Ocalan re azadî û ji pirsgirêka kurd re çareseriya siyasî” bi pêşengiya kesayet û saziyên cîhanî û navneteweyî dest pê kir. Dûre pêngav berfireh bû û hejmara navendên beşdarî wê bûne derket 100`î û gelek saziyên civakî yên Bakur û Rojhilatê Sûriyeyê jî piştgiriya wê kir.

(şx)

ANHA