Ji hewldanên sade heta afirandina tabloyên fîlografîk

Xwendekarê Zanîngeha Kobanê Şêrzad Ehmed Îsmaîl li cem xwendekariya xwe bi hunera fiyografiyê re jî mijûl dibe û berhemeke xwe jî ku bi ta û mixan çêkiriye ku portreya şehîd Ziyad Heleb e, diyarî zanîngeha xwe kiriye.

ROJANE

1 gulan, 2026 05:25

KOBANÊ

SARYA ŞÊXO

Hunermendê 25 salî Şêrzad Ehmed Îsmaîl xwendekarê sala sêyemîn ê Fakulteya Wêjeya Erebî ya Zanîngeha Kobaniyê ye. Di sala 2021’an de dest bi hunera fîlografiyê (nexşên bi ta û mixan têne çêkirin) kiriye û bi derfetên xwe di vê hunerê de xwe bi pêş xistiye. Piştî çend hewldanan, israra wî encam daye û di hunera xwe de bûye pispor.

Şêrzad Ehmed Îsmaîl diyar kir ku ev huner bi şopandina hunermendê iraqî Mihemed Art hîn kiriye.

Berhema wî ya yekem portreya dayika wî bû ku piştî gelek hewldanan kariye çêke. Ew dibêje di jiyanê de tiştekî zehmet tune ye û kesên ji dil bixwazin dikarin bigihêjin armanca xwe.

Di nav berhemên wî de herî zêde portreya şehîd Ziyad Heleb bandor li wî kiriye û ev tablo jî diyarî Zanîngeha Kobaniyê kiriye.

Îsmaîl heta niha nêzîkî 40 tablo çêkirine û ji bo her tabloyekê nêzî 80 saetan dixebite.

Li kêleka vê hunerê Îsmaîl peyker û mûmên bîranînê jî çêdike.

Tevî jêhatîbûna wî, ew di peydakirina alavan de bi zehmetiyan re rû bi rû dimîne, ji ber ku wan ji Heleb, Şam û Iraqê dide anîn.

Şêrzad Ehmed Îsmaîl girîngiya berdewamî û baweriyê bi xeyalan tekez kir û got ew gelekî spasiya xwişka xwe Nalînê dike ku di hemû kêliyên hunerê de ew li kêleka wî bû û alîkara wî dikir.

ANHA