Girtiyên Siwêdayê parêzgerê desthilata Şamê şermezar kir

Roja şemiyê zêdetirî 20 welatiyên Siwêdayê dema berê xwe dida kantona Reqayê li ser bendeke kontrolê ya li Humsê hatibûn girtin. Li dijî girtiyan êşkence û heqaretên mezhebperestî hatin kirin.

Di wê çarçoveyê de, îro ew kesên ku hatibûn girtin li navenda parêzgeha Siwêdayê, bi parêzgerê Siwêdayê yê desthilata Şamê Mustefa Bekor re civiyan û serpêhatiyên xwe jê re vegotin.

Çavkaniyan diyar kir ku hin girtî ji ber xerabûna rewşa wan a derûnî û tenduristî, beşdarî civînê nebûn. Ji ber ku rastî êşkence û lêdanên giran hatibûn û nikarîn amade bibin.

Her wiha hat piştrastkirin ku di girtîgeha Harim de girtiyên mêr û jin ên elewî jî hebûn û hin jin di girtîgehê de li ber welidînê ne.

Di civînê de damezirînerê Partiya Întîma El Wetenî ya Demokratîk Reca El Demeqsî li ser navê girtiyan axivî û got: "Li benda kontrolê ya Humsê û girtîgeha Harim binpêkirin hatine kirin. Rejîma niha, ji aliyê hovîtî û binpêkirinên mafên mirovan, ji ya berê ne cudatir e."

Ciwanekî jî şopên şewita çixareyan li ser laşê xwe nîşan dan û binpêkirinên tê re derbas bûne vegotin.

Beşdaran di axaftina xwe de parêzgerê Siwêdayê li hember bûyerên çêbûne şermezar kir.

Bekor îdia kir ku ew ê vê dozê bişopînin û sûcdaran ceza bikin, her wiha diyar kir ku ew ê komîteyekê ji şêniyên Siwêdayê ava bikin da ku lêpirsînê bişopînin.

Beşdaran bang li rêxistinên hiqûqî, rêxistinên mafên mirovan û civata navneteweyî kir ku lêpirsînekê, sûcdaran ceza bikin û piştgiriya derûnî û tibî bidin girtiyan.

(mh/fr)

ANHA