Eşîrên Ereb nameya Rêber Apo ji bo xurtkirina têkiliyên dîrokî ye

Şêx û rûspiyên eşîrên Ereb ên li kantona Cizîrê ya Bakur û Rojhilatê Sûriyeyê, nameya Rêber Abdullah Ocalan bi erênî nirxandin. Rûspiyan destnîşan kirin ku ew bi QSD`ê û têkiliyên dîrokî yên di navbera kurd, ereb û suryan de re ne.

ROJANE

17 îlon, 2025 22:28

QAMIŞLO

Şandeyeke hevbeş a Meclîsa Rûspiyên Bakur û Rojhilatê Sûriyeyê û Komîteya Însiyatîfa Azadiya Rêber Abdullah Ocalan gerên xwe yên meydanî ji bo hevdîtina bi şêx û rûspiyên eşîrên Ereb re didomîne, nameya Rêber Apo, digihîne wan. Eşîran name bi erênî nirxandin.

Nameya Rêber Apo, ku tê de teqezî li ser pêwîstiya xurtkirina modela Rêveberiya Xweser wekî çarçoveyek ji bo çareserî û aramiyê kir, îro jî ji 9 eşîrên ereb re hat pêşkêşkirin.

Di hevdîtinan de, serokên eşîran piştgiriya xwe ya tevahî ji bo Hêzên Sûriyeya Demokratîk (QSD) û pabendîbûna xwe bi têkiliyên dîrokî yên di navbera Ereb, Kurd û Suryaniyan de anîn ziman.

Şêxê eşîra Şerabîn Newaf Salih El Beşar name wekî bangekî ji bo têkoşîna li dijî nakokî û cudakariya çînî û herêmî bi nav kir, di heman demê de şêxê eşîra Xenafir Xalid El Xelîl, piştgiriya xwe ji bo Rêber Apo û QSD’ê heta nefesa dawî piştrast kir.

Serokê Meclisa Olî ya Til Hemîsê, mele Muatez Enter, got ku name "belgeya biratiya gelan e" û ji aliyê naverokê ve dişibe “Belgeya Medîna Minewera”.

Şêx Feysel Reşîd El Hemîd teqezî li ser pêwîstiya azadiya fîzîkî ya Rêber Abdullah Ocalan kir, ev yek wekî daxwazek bingehîn bi nav kir û destnîşan kir ku Ereb, Kurd û Suryan bi sedan salan e bi hev re bi hezkirin û aştî dijîn.

Endamekî ji eşîra El Cewala Dewas El Hebîb, jî teqez kir ku tevlîbûna nava QSD’ê erkekî neteweyî û exlaqî ye, her wiha destnîşan kir ku eşîra wî bi dehan şehîd ji bo parastina azadî û rûmetê dane.

Şêx Dewas El Hebîb wekî spasiyê, diyareke sembolîk a wêneyên şehîdên êla xwe ji şandeyê re pêşkêş kir û spasiya wan kir ji ber ku nameya Rêber Abdullah Ocalan ragihandine wî û hewldanên wan ên ji bo xurtkirina biratiyê.

Ji eşîra El Bû Asî El Xetîb Îlyas El Mustafa Wecîh û ji eşîra Herb Mehmûd El Hac Mensûr Wecîh name pêşwazî kirin û destnîşan kirin ku îdeolojiya Rêber Abdullah Ocalan, ku li ser aştî û jiyana hevbeş hatiye avakirin, bingeha ku tecrubeya Rêveberiya Xweser û kilîta ewlehiyê ya gelên bidest e.

Her wiha rûspiyan diyar kirin ku projeya demokratîk a heyî, ku xwe dispêre QSD`ê, stûna bingehîn a têkoşîna li dijî zihniyeta dûrxistinê û hewldanên derxistina fitneyê û parçekirinê ye.

Şandeyê piştrast kir ku gerên wê dê berdewam bikin da ku nameyê bigihînin tevahî êlên ereb ên herêmên Bakur û Rojhilatê Sûriyeyê.

(ac/şx)

ANHA