Endamên HPC’ê hatin xelatkirin

Rêveberiya Xweseriya Demokratîk a Kantona Cizîrê ji bo xelatkirina Hêzên Parastina Civakê (HPC, HPC-Jin) şahiyek li Navenda Çand û Hunerî ya Serdem a li bajarê Hesekê li dar xist.

HPC û HPC-Jin ji bo parastina zeviyên çandiniyê îsal gelek kar û xebat kirin. 24 saetan dewre li dar xistin.

Di merasîmê de endamên hêzê, hevserokatiya Meclisa Rêveber a Kantona Cizîrê hazir bûn.

Hevserokê Meclisa Rêveber a Kantona Cizîrê Talet Yunis axivî û HPC, HPC-Jin û hewldanên wan ji bo parastina mewsima çandiniyê silav kir. Yunis destnîşan kir ku hêzê ji destpêka Şoreşa 19`ê Tîrmehê ve, ewlehiya herêmê diparêze.

Yunis wiha domand: "Ev hewldan, berhema giyanê şoreşgerî ya ji bo parastina gelê me ji xetereyan û gefên dijminên biratiya gelan û projeya demokratîk e.”

Yunis diyar kir ku gef li ser mewsima çandiniyê hebû û wiha domand: "Bi saya HPC, HPC-Jin, Hêzên Sûriya Demokratîk (QSD) û Hêzên Ewlekariya Hundirîn, me mewsima çandiniyê parast û zirar gelek kêm bûn. Em spasiya we dikin."

Yunis diyar kir ku pergala parastina civakî, bingeha Rêveberiya Xweseriya Demokratîk e û ev li gotinên xwe zêde kir: "We bi rêxistinbûyîna xwe, giyanê parastina cewherî rave kir. Me bi rêya wê komployên li dijî herêmê û rêveberiya me ya xweser têk birin.”

Talet Yunis destnîşan kir ku civakên birêxistinkirî û hevgirtî ne pêkan e têk biçin û got: “Divê em pergala parastinê xurttir bikin. Divê em wê pergalê û yekitiya di navbera pêkhateyan de pêş bixin.”

Di dawiyê de Rêveberiya Xweseriya Demokratîk a kantona Cizîrê, endamên HPC û HPC-Jin xelat kirin.

(şx)

ANHA