Di salvegera Serhildana Şêx Seîd de qirkirina Kurdan şermezar kirin

Kongreya Îslama Demokratîk di daxuyaniya xwe bi boneya sedsaliya Serhildana Şêx Seîd de siyasetên qirkirinê ku dewleta Tirk li dijî Kurdan dimeşîne, şermezar kirin.

15 sibat, 2025 13:59

QAMIŞLO

Kongreya Îslama Demokratîk bi boneya sedsaliya Serhildana Şêx Seîdê Pîran daxuyaniyek li bajarê Qamişloyê da.

Daxuyanî bi amadebûna endamên kongreyê ji aliyê Mele Hogir Hesen ve hat xwendin.

Di daxuyaniyê de hate diyarkirin ku komara Tirk li ser esasê qirkirin û înkarkirina gelan, bi taybetî gelê Kurd ava bûye.

Hate bibîrxistin ku Şêx Seîd li hemberî siyasetên qirkirin û înkarê yên komara Tirk di 15’ê Sibata 1925’an de serhildana gelê Kurd da destpêkirin.

Di daxuyaniyê de îşaret bi Komploya Navneteweyî ya 15’ê Sibata 1999’an a li dijî Rêber Abdullah Ocalan hate kirin ku pêkanîna komployê di salvegera serhildana Şêx Seîd de nîşaneya komployên li dijî hebûna Kurdan e, di heman demê de berdewama siyasetên înkar û qirkirinê yên li dijî gelê Kurd e.

Di dewama daxuyaniyê de hate gotin, bi saya mîraseya çandî ya gelê Kurd û ramanên Rêber Abdullah Ocalan komplo têk çû. Her wiha hate destnîşankirin ku gelê Kurd û gelên din ji bo bidestxistina mafên xwe yên rewa têkoşînê didomînin.

Di dawiya daxuyaniyê de şehîdên azadiyê hatin bibîranîn.

(bb)

ANHA