Cenazeyên şehîd Cîhan Bîlgîn û Nazim Daştan hatin definkirin

Nûçegihana me Cîhan Bîlgîn û rojnamevan Nazim Daştan ku ji Bakurê Kurdistanê ne, 19ˈê Kanûna 2024ˈan li ser rêya Bendava Tişrînê-bajarê Sirînê di êrişeke hewayî ya dewleta Tirk a dagirker ya li dijî erebeyan wan de, şehîd bûn.

6ˈê Çileyê cenazeyên her du piştî merasîmeke girseyî ya li bajarê Qamişloyê li ser daxwaza malbatên wan ber bi Bakurê Kurdistanê ve hatin oxirkirin.

Şandeya ji Parlamenterê DEM Partiyê yê Mêrdînê Kamûran Tanhan, bavê rojnamevan Nazim Daştan, bavê rojnamevan Cîhan Bîlgîn, endamên Komeleya Hiqûqnasên ji bo Azadiyê (OHD), MEBYA-DERê û DFGê pêk tê ji bo cenazeyê rojnamevan Nazim Daştan û Cîhan Bîlgîn werbigirin ji Nisêbînê ber bi Başûrê Kurdistanê ve derketin rê.

Şande gihişt Deriyê Xabûr ê Silopiyayê û li vir şande ji aliyê Midûriyeta Polîsan a Silopiya ve bi hinceta “Xray” xerabe ye hat rawestandin. Beriya vê hinceta Xrayê were nîşandan şande nêzî du saetan li ber derî bi hinceta ku “sîstem çûye” hat sekinandin. Piştî ku şande derbasî beşa Xrayê bû vê carê jî bi hinceta ku Xray xerabe ye tê sekinandin.

Parlamenter Kamûran Tanhan ji ber vê hincetê bi Wezareta Karên Navxweyî û Wezareta Karên Derve yên Tirkiyeyê re hevdîtin pêk anîbû lê hê jî ji her du wezaretan ji bo derbasbûna şandeyê tu bersivek erênî nehatiye dayin.

Kamûran Tanhan têkildarî sekinandina şandeyê destnîşan kir ku ev biryara sekinandina şandeyê kêfî ye û gotibû: “Hurmeta li hemberî cenazeyan jî nemaye. Rêzgirtin ji miriyan re jî nemaye. Ev li tu deverek dinyayê nîne. "

Îro cenazeyên şehîd Cîhan û şehîd Nazim li Pakrewangeha Şehîd Delîl Saroxan a li bajarê Qamişloyê ve hatin definkirin.

(bb)

ANHA