Çalakiya konvedanê ya ji bo zimanê kurdî li Dêrikê didome

Şênî û xwendekarên bajarê Dêrikê ji bo redkirina tenê dayîna 3 dersên zimanê kurdî di hefteyekê de û daxwaza perwerdeya bi zimanê dayîkê, çalakiya xwe ya konvedanê di roja çaremîn de didomînin. Çalakvanan dan zanîn ku parastina mafê wan bi naskirina destûrî û perwerdeya bi zimanê kurdî pêk tê.

13 îlon, 2026 13:27

QAMIŞLO

Çalakiya şêniyên bajarê Dêrikê yê herêma Cizîrê ya ku ji 10`ê Îlonê ve bi mebesta daxwaza naskirineke fermî û destûrî ya zimanê kurdî, perewrdeya bi zimanê dayîkê di bin konê ku ji hêla Înîsiyatîfa Gel a bajêr hatibû vedan dest pê kiribû, di roja xwe ya çaremîn de didome.

Konê çalakiyê li pêşiya dibistana Yûsif El Ezma ya li bajarê Dêrikê hatiye vedan.

Îro şênî û xwendekarên gundewarên herêma Beravê ya girêdayî Dêrikê berê xwe dane konê çalakiyê, di bin kon de şêniyan helwesta xwe ya li hemberî biryara Wezareta Perwerde û Fêrkirinê ya hikumeta veguhêz a Sûriyeyê ya têkildarî tenê dayîna 3 dersên zimanê kurdî di hefteyekê de nîşan dan.

Şênî daxwaza sererastkirina biryarê kirin, bang kirin ku materaylên perwerdeyê bi zimanê kurdî jî werin dayîn û zimanê kurdî di destûrê de were naskirin.

Çalakvan çalakiya xwe ya protestokirinê berdewam dikin, destnîşan dikin ku ew ê heta naskirina zimanê kurdî têkoşîna xwe ya ji bo zimanê xwe yê dayîkê bidomînin.

(sb)

ANHA