Deh hezaran kesan rojbûna Rêber Abdullah Ocalan pîroz kir

Di çarçoveya çalakiyên bi boneya rojbûna Rêber Abdullah Ocalan (4'ê Nîsanê) de, li bajarên Hesekê, Qamişlo û Heleb, Dêrikê û navçeyên Tirbespî, Çilaxa û Til Birak şahî li dar ketin. Li kantona Minbicê jî şêniyan dar çandin.

QAMIŞLO

Bi sedan xelkê Qamişlo li Parka Azadî roja rojbûna Rêber Abdullah Ocalan pîroz kir.

Piştî pêşkêşkirina senvîzyona têkildarî nirxandinên Rêber Abdullah Ocalan, endama Koordînasyona Kongra Star Gulîstan Gulo axivî û diyar kir ku Rêber Abdullah Ocalan bi fikra xwe li hemberî desthildaran derket, projeya wî ji bo gelan bû çareseriya pirsgirêkên wan û Şoreşa Rojava nimûneya projeya Rêber Abdullah Ocalan e û got: “Rojbûna Rêber Apo rojbûna edalet, wekhevî û aştiyê ye.” Paşê endama Yekitiya Jinên Ciwan li bajarê Qamişlo Zêrîn Hesaf soza tevlêbûna nava refên gerîlayên tevgera azadiyê da. Piştre hunermend Nesrîn Botan, Koma Pale, Koma Şehîd Welat a Govendê, Hunermend Esad Zekî, Koma Şehîd Sakîne, Koma Botan û hunermend Mihemed Kakilo stran gotin û govend gerandin. Şêniyan jî bi sloganên “Bijî Serok Apo” govend gerandin û şahî bi perzkirina sloganan bi dawî bû.

Li Tirbespiyê şahî li Parka Rêber Abdullah Ocalan li dar ket û tê de pêkhateyên navçeyê yên Kurd, Ereb û Suryan beşdar bûn.

Di şahiyê de rêvebera Kongra Star Xaliye Ehmed rojbûna Rêber Abdullah Ocalan li gelên azadîxwaz pîroz kir û got: "Fikrê Rêber Ocalan civak rêxistin kir û li ser esasa wî berxwedana li hember zulm û koletiyê didome."

Piştre koma Nehewend û Maşûq û ya şehîd Xebat stran pêşkêş kirin û koma şehîd Rêwan govendên folklorî pêşkêş kirin.

HESEKÊ

Bi sedan şêniyên bajêr li Parka Serdem ji bo pîrozkirina rojbûna Rêber Abdullah Ocalan kom bûn.

Di şahiyê de endamên saziyên sivîl û leşkerî, partiyên siyasî û rêxistinên jinan beşdar bûn.

Di serî de rêvebera Meclisa Hesekê Fîdan Sîdo rojbûna Rêber Abdullah Ocalan pîroz kir û got: "Rojbûna Rêbertî şoreşa gelê azadîxwaz, şoreşa jinan û şoreşa demokrasiyê ye."

Şahî bi gerandina govendan bi dawî bû.

HELEB

Şênî li pêşiya Çerxerêya Gulê Selmo ya rojavayê taxa Şêxmeqsûd kom bûn û ber bi Çerxerêya Rêber Abdullah Ocalan ve bi rê ketin. Li wir hevserokê Şaredariya Gel a taxên Şêxmeqsûd û Eşrefiyê Emîn Elîko berxwedana Rêber Abdullah Ocalan a li Îmraliyê silav kir û soza bilindkirina asta têkoşînê ji bo pêkanîna azadiya fîzîkî ya Rêber Abdullah Ocalan da.

Şahî bi diruşma silavkirina berxwedana Rêber Abdullah Ocalan û banga pêkanîna azadiya wî ya fîzîkî bi dawî bû.

ÇILAXA

Pêkhateyên Çilaxa li pêşiya hola Roj a bakurê navçeyê kom bûn.

Hevseroka Şaredariya Gel Firyal Qesûm li ser rojbûna Rêber Abdullah Ocalan axivî û pîroz kir.

Piştre hevseroketiya Meclisa Çilaxa Necûde Faris û Mihemed Faris ji aliyê Kongra Star a navçeyê ve bi wêneyên Rêber Abdullah Ocalan hatin xelatkirin.

Helbestvan Salih Sefo li ser berxwedana Rêber Abdullah Ocalan helbest xwendin.

Şahî bi stranên şoreşgerî ji aliyê hunermend Aras Yûsif ve bi dawî bû.

TIL BIRAK

Qada Foca Şehîd Rêzan bi wêneyên Rêber Abdullah Ocalan, wêneyên şehîdan û pankart hatin daliqandin.

Di şahiyê de endama Kongra Star a Til Birakê Ezra Hisên rojbûna Rêber Abdullah Ocalan li tevahî gelên azadîxwaz pîroz kir û got: "Ev roj ne tenê rojbûna Rêbertî ye, rojbûna tevahî gelan e û xwedî wateyeke mezin e."

Dûre rûspiyê eşîra Xewatine Welîd El Xefo rojbûna Rêber Abdullah Ocalan li gelên herêmê pîroz kir û got: "Di vê rojê de û jidayikbûna Rêber Abdullah Ocalan re her wiha bi felsefe û fikrên wî yên mezin rêya tevahî gelan hat ronîkirin. Dê ev roj meşaleya hêviyê ya pêkanîna serkeftinê û gihandina azadiya fîzîkî ya Rêbertî û tevahî civakan be."

Di şahiyê de hunermend Teleb Nazir û Tariq Hisên stran gotin, koma Şehîdan Dîlan dîlan gerand.

MINBIC

Li Minbicê jî endamên Rêveberiya Xweser a kantonê, xet, meclisên sivîl, Nivîsgeha Koçberên Şehba û Efrînê, xelkê kantonê dar li Parka Yasmîn a li taxa Serb a li aliyê bakurê bajêr çandin.

Beşdaran bi dehan darên curbecur bi boneya 4ˊê Nîsan di ber stranan re çandin.

DÊRIK

Li Dêrik jî bi heman boneyê li Parka Dicle şahiyek hat lidarxistin û di şahiyê de xelkê bajêr beşdar bû. Her wiha koman hunerên xwe pêşkêş kirin û beşdaran dîlan gerandin.

AMÛDÊ

Kongra Star li navçeya Amûdê li hola Beylesan şahiyek li dar xist.

Di şahiyê de endama rêvebera Kongra Star Nûra Hisên axivî û got: "Rojbûna Rêbertî rojbûna mirovahî, azadî, demokrasî bi taybet rojbûna jinê ye. Rêbertî azadî kir para jinê û di oxira doza wê de tê koşiya û bi hemû hêza xwe hewl da jinê bigihîne cihekî qedirbilind."

Dûre koma Şehîd Agirî sranên gotin, her wiha hunermened Elî Mensor stranên pêşkêş kirin, koma Şehîd Reyhan û koma Delîla dîlan û govend gerandin.

(mh-fr)

ANHA