Bi boneya 15’ê Gulanê meş: Divê zimanê Kurd di destûrê de were naskirin

Li Qamişlo, Girkê Legê, Dêrik, Çilaxa, Hesekê, Til Temir, Dirbêsiyê û Şedadê, bi boneya nêzîkbûna 15’ê Gulanê Roja Zimanê Kurdî meşên girseyî hatin lidarxistin. Meş ji aliyê rêveberiyên dibistanan, Yekitiya Mamosteyan û Saziya Zimanê Kurdî (SZK) ve bi dirûşma "Zimanê me nasnameya me ye" hatin lidarxistin.

HESEKÊ

Li bajarê Hesekê bi beşdariya hejmareke mezin a mamoste, xwendekar û endamê saziyên civakî û perwerdeyê meşek girseyî hatin lidarxistin. Meş ji çerxerêya Merşo dest pê kir û li qada Azadî ya naverasta bajar bi dawî bû.

Di meşê de alên Rêveberiya Xweser û Yekitiya Mamosteyan hatin hildan û pankartên bi nivîsên "Zimanê me rûmeta me ye" û "Zimanê me xweş e" hatin vekirin.

Mamoste Ezîz Elî bi zimanê kurdî daxuyanî xwend û got: "Em îsal bi kêfxweşiyeke mezin Roja Zimanê Kurdî (15’ê Gulanê) pîroz dikin. Em vê rojê wekî rojeke dîrokî pênase dikin û li gelê xwe, tevahî têkoşer û kesên ku azadiya Kurdistanê dixwazin û di rêya wê de têkoşîn kirine, pîroz dikin. Bi ked û saya şehîdan doza me ya neteweyî derbasî qonaxeke nû bû. Dem hatiye ku destkeftiyên şoreşa me, di serî de jî mafên bikaranîna zimanê Kurd ku nirxekî bilind ê gelê Kurd e, di destûrê de were naskirin. Em bang li civaka xwe dikin ku bi rihê berpirsyariyê vê rojê pîroz bikin. Ji niha ve em bi tevkariya saziyên perwerdeyê yên  Rojava û li Bakur û Rojhilatê Sûriyeyê çalakiyên bi vê boneyê bi berfirehî bi rêxistin bikin û vê kêliya dîrokî pîroz bikin. Em her rojên xwe bikin rojên zimanê xwe. Bê zimanê dayikê jiyan nabe."

TIL TEMIR

Li bajarê Til Temirê jî bi sedan mamoste, endamên saziyên civaka sivîl û partiyên siyasî bi boneya Roja Zimanê Kurdî meşiyan. Meş ji pêşiya avahiya Meclisa Malbatên Şehîdan ber bi çerxerêya giştî ya Hesekê - Serêkaniyê ve dest pê kir. Di meşê de pankartên "Perwerdeya bi zimanê dayikê mafê rewa û bingehîn e" hatin vekirin.

Meş li çerxerêya Qendîla Mezin veguherî mîtîngê. Li vir rêveberê Yekitiya Mamosteyan Ferhan El Tean bi zimanê erebî û hevseroka Rêveberiya Dibistanan Ayhan El Yûnis bi zimanê kurdî daxuyanî xwendin. Di daxuyaniyê de Roja Zimanê Kurdî hat pîrozkirin û hate gotin "Ev serkeftî ku berhema şoreş û kedê ye, divê were parastin. Bi vê wesîleyê em bang li tevahiya gelê xwe dikin ku beşdarî pîrozbahiya vê rojê bidin û perwerdeya bi zimanê kurdî di hemû saziyan de bidin fêrkirin û di destûrê de mîsoger bikin."

DIRBÊSIYE

Li bajarê Dirbêsiyê jî bi sedan mamoste, xwendekar û endamên meclisan meşek li dar xist. Meş ji Qada Jina Azad ber bi Rêya Amûdê ve dest pê kir. Beşdaran  dirûşmên "Zimanê Kurd nasnameya me ye", û"Naskirina zimanê me mafekî rewa ye" vekirin.

Di dawiya meşê de rêvebera Rêveberiya Dibistanan Zozan Erebo daxuyanî xwend û got: "Em li vir in da ku roja zimanê xwe yê dayikê pîroz bikin. Zimanê Kurdî mafekî xwezayî û bingehîn e. Zimanê Kurdî ne tenê amûreke peywendiyê ye, di heman demê de cewhera nasname, çand û neteweya me ye. Divê zimanê me di destûra Sûriyeyê de bi fermî were naskirin."

ŞEDADÊ

Li bajarê Şedadê jî bi dehan endamên Navenda Perwerdeyê û xebatkarên qeda perwerdeyê ji pêşiya avahiya navendê çalakî li dar xist. Mamoste Elî El Cerad daxuyanî xwend û got "Bi boneya Roja Zimanê Kurdî, em silavên xwe ji hemû têkoşerên parastina zimanê dayikê re dişînin. Yek ji destkeftiyên Şoreşa Bakur û Rojhilatê Sûriyeyê naskirina mafên gelan, di serî de mafê perwerdeya bi zimanê dayikê ye. Em teqez dikin ku divê zimanê kurdî di destûrê de were naskirin û ji bo pêşxistina vî mafî çalakiyên perwerdeyê werin birêxistinkirin. Ji vir ve em bang li hemû saziyan dikin ku beşdarî çalakiyên vê boneya pîroz bibin. Bila hemû rojên me bibin roja zimanê dayikê, ji ber ku bi zimanê dayikê jiyan nabe."

DÊRIK

Li Dêrikê jî bi sedan mamoste û xwendekar bi boneya Roja Zimanê Kurdî meşek bi dirûşma "Fêrbûna bi zimanê dayikê mafekî rewa û bingehîn e" li dar xist.

Girse ji pêşiya avahiya Meclisa Malbatên Şehîdan ber bi çerxerêya Şehîdan a li sûka navendî ve meşiyan. Di meşê de alên Rêveberiya Xweser hatin hildan û dirûşme hatin berzkirin.

Di çalakiyê de xwendekara bi navê Dêrsim Elî daxuyanî xwend. Di daxuyaniyê de Roja Zimanê Kurdî li hemû têkoşerên Kurdistanê hat pîrozkirin û hate gotin:  "Bi saya keda şehîdan û karkeran doza gelê me derbasî qonaxeke nû bûye. Di serî de mafên zimanê dayikê divê em destkeftiyên şoreşa xwe biparêzin."

Di dawiya daxuyaniyê de banga tevlêbûna çalakiyên Roja Zimanê Kurdî hat kirin.

TIRBESPIYÊ

Li bajarê Tirbespiyê jî meşek hat lidarxistin. Girse ji pêşiya avahiya Rêveberiya Dibistanan heya avahiya Meclisa Bajar Meşiyan.  Bi navê Rêveberiya Dibistanan xwendekara bi navê Sozvîn Xelîl daxuyanî xwend. Di daxuyaniyê de hate gotin: "Em bi kêfxweşî û coşek mezin Roja Zimanê Kurdî pîroz dikin. Divê em destkeftiyên xwe û zimanê xwe biparêzin, zimanê me nirxekî mezin ê gelê me ye, divê di destûrê de were naskirin. "

GIRKÊ LEGÊ

Li Girkê Legê jî bi beşdariya bi sedan mamoste û xwendekaran meşek hat lidarxistin. Girse ji qada Şehîd Xebata dest bi meşê kir. Meş li sûka bajar veguherî mîtîngê û deqeya rêz hat girtin. Rêveberê Yekitiya Mamosteyan Ehmed El Ebdullah axivî û anî ziman ku fêrbûna bi zimanê dayikê mafekî rewa  ye û pîrozkirina vê rojê berhemên keda têkoşerên azadiya Kurdistanê  ye.

Di daxuyaniyê de bang hat kirin ku divê zimanê Kurdî  di destûrê de were naskirin.

AMÛDÊ

Li bajarê Amûdê jî girseyeke mezin ji Qada Şehîd Cîhad heya Qada Jina Azad meşiya. Meş li Qada Jina Azad veguherî mîtîngê û deqeyeke rêz hat girtin.

Rêvebera Rêveberiya Dibistanan a bajarê Amûdê Hana Xalid axivî û got: "Bi saya xwendekarên ku xwendina xwe berdewam kirine me zimanê xwe parastiye. Zimanê me beşek ji dîroka gel û çanda Kurdî ye, lew ra divê em zimanê xwe ji hewldanên çewisandina çandî biparêzin."

ÇILAXA

Rêveberiya Dibistanan a bajarê Çilaxa jî bi beşdariya mamoste û xwendekaran, endamên saziyên sivîl, partiyên siyasî û malbatên şehîdan meşek girseyî li dar xist.

Meş ji pêşiya avahiya Perwerdeyê dest pê kir û li pêşiya Navenda Rêveberiya Dibistanan sekinî. Endama Rêveberiya Dibistanan Henîfe axivî. Henîfe Silêman Roja Zimanê Kurdî pîroz kir û got: "Gelê Kurd li ku derê bû, zimanê xwe parast û zarokên xwe hînî ziman kir, ji ber ku zimanê me nasnameya me ye. Em zimanê xwe biparêzin, em hebûna xwe û çanda xwe diparêzin."

Meş bi dirûşma "Bê ziman jiyan nabe" û "Zimanê me rûmeta me ye" bi dawî bû.

QAMIŞLO

Li bajarê Qamişloyê jî mamoste û xwendekaran bi dirûşma "Perwerdeya bi zimanê dayikê mafekî bingehîn û rewa ye" meşiyan.

Girseya bi cil û bergên xwe yên neteweyî li çerxerêya 4 kolanan a bajarê Qamişloyê kom bû pankartên bi nivîsên "Zimanê min hebûna min e, ziman hebûn e, hebûn jiyan e, zimanê kurdî hebûna me ye, her tîpek di zimanê kurdî de dîrok û şaristanî ye" vekirin. Her wiha helbestên Ehmedê Xanê, Melayê Cizîrî, Muradê Xanî Bazdî û Baba Tahirê Hemdanî vekirin.

Girse li kolanên bajar meşiyan û li Stadyuma Şehîd Heysem Kiço sekinîn. Li vir çalakiyek hat lidarxistin. Piştî deqeya rêzgirtin û sirûda Ey Reqîb, endama Komîteya Perwerdeyê Sîlva Şêxo bi zimanê Kurdî û mamoste yê zimanê Erebî Qehtan Deham bi zimanê Erebî daxuyanî xwend. Di daxuyaniyê de, Roja Zimanê Kurdî hat pîrozkirin û hate gotin, bi saya keda şehîd û têkoşeran doza neteweyî ket pêvajoyek nû. Bang hat kirin ku zimanê kurdî di destûra nû de were naskirin.

(bb)

ANHA