Beşa protezê ya Nexweşxaneya Qamişloyê hat berfirehkirin

Sala 2023`yan bi hevkariya Komîteya Navneteweyî ya Xaça Sor û Wezareta Tenduristiyê, ji bo pêşkêşkirina xizmeguzariyeke bêpere, li Nexweşxaneya Gel a Qamişloyê Beşa Protezê hat vekirin.

Îro ev beş hat berfirehkirin û bi merasîmeke fermî hat vekirin. Beş bi destê Cîhan Hessam, Sîlviya Digilman û Xalid El Xalid ve hat vekirin, paşê şandeya amade bi bijîşkê nexweşxaneyê û bijîşkên beşa protezê re li beşa ku nû hate vekirin geriyan.

Piştre bijîşk û gerînendeyê tenduristiyê yê Hesekê axivî û da zanîn ku ew dixwazin ev beş hîn zêdetir bê pêşxistin û ew yekemîn navenda hikumetê ya beşa protezê ya li parêzgeha Hesekê ye.

Gerînendeya herêma Qamişloyê Cîhan Hessam jî berfirehkirina beşê pîroz kir û got: “Ev cara yekemîn e ji hêla hikumetê ve ev beş tê vekirin, bajarên me di gelek şeran re derbas bûn, gelek şênî parçe ji bedena xwe winda kirin, ev xebateke mezin û xwedî nirx e.”

Cîgira serokê şandeya Xaça Sor a Hesekê Sîlviya Digilman jî axivî, spasiya hemû amadebûyan û tîma beşa protezê kir û got: “Ev navend ji sala 2023`yan ve vekirî ye, lê mixabin ji ber rewşê nehate berfirehkirin, ji ber pêdiviya zêde ya bi vî beşî em neçar man ku cihê wê berfireh bikin, em ê bi hev re wê zêdetir bi pêş bixin.”

Piştre, şande li nexweşxaneyê geriya û li rewşa nexweşan pirsîn.

(sb)

ANHA