Bazirganekî narkotîkê hate girtin

Hêzên Ewlekariya Hundirîn li ser malpera xwe ya fermî daxuyaniyek parve kir û aşkera kir ku li bajarê Hesekê bi kemînekê bazirganekî narkotîkê girtiye.

Agahiyên ku di daxuyaniyê de hatine parvekirin bi vî rengî ne: "Piştî xebatên şopandinê û li ser agahiyên ku hatine bidestxistin ku hebên narkotîkê ji Bû Kemalê derbasî Dêrazorê dike û dûre derbasî bajarê Hesekê dike, tîmên lêgerînê dest bi xebatên şopandinê kir. Duşemê bi kemînekê dema gihaşt bajarê Hesekê li ser sûc girt û hebên narkotîkê yên pê re desteser kirin."

Hêzê aşkera kir ku bi bazirganê girtî re, 7 hezar û 677 hebên Captagon û pere hatine desteserkirin.

Hêzê da zanîn ku bazirgan li xwe mikur hatiye ku bazirganiya narkotîkê dike û bi qaçaxî derbasî herêmê dike. Her wiha hêzê diyar kir ku ji bo temamkirina tedbîrên qanûnî dê bazirgan û madeyên pê re hatine desteserkirin, sewqî dadgeha têkildar bikin.

Hêzê got xebatên wan ên ji bo girtina bazirgan û belavkerên narkotîkê berdewam in û bang li şêniyan kir ku gumana wan li tiştekî hebe yekser bi rêya vê hejmarê ‘0995966682’ li wan bigerin.

(şx)