7 roj e çiya û deştên Efrînê dişewitin

Çavkaniyên xwecih ên ji hundirê Efrîna dagirkirî ji nûçegihanê ajansa me re da zanîn ku ev 7 roj e çeteyên dewleta Tirk a dagirker agir bi deşt û çiyayên Efrînê dixin.

Çavkaniyan diyar kir ku duh êvarê saet nêzî di 20:00'an de çeteyan agir bi zeviyên gundê Derwîş xist.

Piştî 7 rojan ji şewata li gelek zevî û gundan, li gorî amarên berdest bi deh hezaran darên berhemdar (zeytûn, kerez, hinar, fistiq helebî, hejîr û tirî) û yên merxê şewitîne.

Çete li van gundan agir berdane zeviyan: Edema, Elbîskê, Bilîlko, Cela, Xilalka, Kosa, Şingêlê, Berava û Derwîş. Bi vî awayî hejmara gundên ku şewat lê çêbûye bûn 9, hin gundên din hene, hîna nehatine belgekirin.

Çavkaniyan her wiha destnîşan kir ku tu alî ji bilî şêniyên Efrînê ji bo vemirandina agir destwerdan nekir. Ev jî daxwaza dewleta Tirk a dagirker û çeteyên wê ye ku xwezaya Efrînê têk bibin.

Hêjayî bibîrxistinê ye ku artêşa Tirk a dagirker û çeteyên wê zêdetirî 391 hezar û 900 darên berhemdar û hawîrdorê birîn û firotin. Her wiha 12 hezar hêktar ji zeviyên çandiniyê di 6 salên dawîn de şewitandine.

(mh/fr)

ANHA