Şaredariyên Herêma Cizîrê civînên girseyî ji welatiyan re li dar xistin

Şaredariya Gel a Dêrikê civînek ji xelkê Dêrikê ya Qamişloyê re li Navenda Çand û Hunerê ya bajêr li dar xist. Di civînê de projeyên stratejîk û xizmetguzarî yên 2024′an hatin nîqaşkirin. Ew yek hemwextî êrişên artêşa Tirk a dagirker ên li dijî avahiyên stratejîk û xizmetguzarî pêk tê.

Di civînê de projeyên ji bo 2024′yan ji hêla hevseroka Şaredariya Gel a Dêrikê Bêrîvan Hisên ve hatin xwendin. Di projeyan de bal li ser çêkirina rê, qîrkirin, jinûve çêkirina kunên avê, avakirina sûkekê ji bo firotina mirîşekan, vekirina Hîzam a bakur, avakirina park, sererastkirina hin torên kanalîzasyonê û projeyên kişandina ava vexwarinê û ronîkirinê hatin kişandin.

Bêrîvan behsa astengiyên xebatê yên li pêşberî şaredariyê kir, bi taybet êrişên dawîn ên dewleta Tirk a dagirker ku avahiyên xizmetguzarî û stratejîk hatin hedefgirtin.

Nûnerên şaredariyê li nêrîn û pêşniyarên beşdaran ên der barê projeyên xizmetguzariyê guhdar kirin, da ku bixin plana xwe ya bê û li gorî budceya xwe pêk bînin.

 Bêrîvan got ew ê li gorî derfetên heyî bersivê bidin daxwazên welatiyan û soz da ku şêniyan ku ew ê rewşa xizmetguzarî baş bikin.

Hevserokê Desteya Şaredariyan a Herêma Cizîrê Silêman Ereb got ew ê tevahî pêşniyaran lêkolîn bikin û bixin projeyên xwe yên 2024′an.

Ereb di dawiyê de got: "Piştî budceya ji bo projeyên 2024′an hate diyarkirin dê civîneke din ji komînan re were lidarxistin û projeyên bikevin pratîkê, çawanî û dîroka xebata şaredariyê li ser wan projeyan bê lidarxistin.

Di vê çarçoveyê de Şaredariya Gel a Dirbêspiyê civînek ji hevserokên komên gund û taxên Dirbêsiyê re li dar xist.

Civîn li hola Navenda Çand û Hunerê ya navçeyê hate lidarxistin û li pêşniyarên beşdaran hatin guhdarkirin.

Di pêşniyaran de hate gotin ku rêyên navçeyê, rêyên di navbera hin gundên li bajarokê Til Kerem werin qîrkirin, nuqteya tibî ya li heman bajarokî were aktîfkirin. Li aliyekî din jî pêşniyarên der barê kişandina ava vexwarinê û sererastkirina torên kanalîzasyonê hatin kirin.

Dûre hevserokê Şaredariya Dirbêsiyê Zîlan Ereb li ser çawaniya lêkolînkirina pêşniyar, gilî û astengiyên li pêş şaredariyê, nexasim êrişên li dijî Bakur û Rojhilatê Sûriyeyê yên di 4′ê Cotmehê de ku binesazî hatin hedefgirtin axivî.

Zîlan got xebatên pêşîn ên şaredariyê ji bo sala bê çareserkirina prisgirêkên ava vexwarinê, çareserkirina torên kanalîzasyon û qîrkirina rêyan in.

(fr)

ANHA