Li Dêrazorê bi sedan kesî azadiya Rêber Abdullah Ocalan xwest

Bi sedan şêniyên kantona Dêrazorê, rûspiyên eşîran, endamên saziyên sivîl, leşkerî, partiyên siyasî, rêxistinên jin û ciwanan bi meşeke girseyî Komploya Navneteweyî ya li dijî Rêber Abdullah Ocalan şermezar kir.

Girseya şermezarkirina komployê bi bilindkirina wêneyên Rêber Abdulla Ocalan û vekirina pankartên "Em ê roja reş veguherînin roja azadiya Rêber Apo" ji pêşiya avahiya Meclisa Rêveber a Kantona Dêrazorê ya li herêma Sebha Kîlo dest bi meşê kir. Di meşê de dirûşmên "Bê Serok jiyan nabe" û "Hilweşe Komploya Navneteweyî ya li dijî Rêber Abdullah Ocalan" û "Bijî serok Abdullah Ocalan" hatin berzkirin.

Girse nêzî 2 kîlometreyan meşiya û li Pira Salihiyê ya heman herêmê sekinî û mîtîngek hat lidarxistin.

Piştî deqeya rêzgirtinê, şêwirmendê Rêveberiya Xweser a Kantona Dêrazorê Şiyar Mihemed axivî. Şiyar Mihemed anî ziman ku ji bo azadiya fîzîkî ya Rêber Abdullah Ocalan divê asta têkoşînê were bilindkirin.

Şiyar Mihemed komplo şermezar kir û got: "Komplo ne tenê revandina Rêber Abdullah Ocalan bû, lê belê hewldanek ji bo lawazkirina hêviya gelên lêgerînerên azadiyê bû."

Şiyar Mihemed destnîşan kir ku tevî hemû hewldan û komployan, ramanên Rêber Abdullah Ocalan ji bo bi milyonan mirovan bûne jêdera îlhamê.

Mîtîng bi berzkirina dirûşmên şermezarkirina pergala îşkence û qirkirinê ya li dijî Rêber Abdullah Ocalan û daxwaza azadiya wî ya fîzîkî bi dawî bû.

(bb)

ANHA