Ji Şehba heta Dêrîkê pîrozbahiyên salvegera PKK’ê

Bi minasebeta salvegera damezirandina PKK’ê li Şehba, Kobanê, Hekesê, Til Temir-Zirgan, Qamişlo, Tirbespiyê, Dêrik, Til Koçer û Til Koçer şahî hatin lidarxistin. Di şahiyên ku bi deh hezaran ji pêkhateyên Kurd, Ereb û Suryan tevlî bûn de, peyamên têkoşîna hevpar a gelan û azadiya fizîkî ya Rêber Abdullah Ocalan hatin dayîn. 

KOBANÊ

Pîrozbahiya herêma Firatê li Meydana Şehîd Egîd a li Kobanê hat lidarxistin. Pîrozbahiya ku welatiyên navenda Kobanê û navçe, bajarok û gundên herêmê, rêveberên sazî û dezgehên Rêveberiya Xweser jî tevlî bûn, piştî rêzgirtinê bi axaftinan dom kir.

Hevserokê Meclîsa Malbatên Şehîdan a Navçeya Sirrinê Behîya Elî di axaftina xwe de salvegera damezirandina PKK’ê pîroz kir û destnîşan kir ku PKK ji bo tevahiya gelên bindest bûye rêya rizgariyê. Behîya Elî anî ziman ku bi têkoşîna dîrokî ya Rêber Abdullah Ocalan gelên di tarîtiyê de mane, careke din derketine ser ruyê erde û got: “Dewleta Tirk a hêzên komploger dijî vê têkoşînê êrîşan pêk tînin, lê berxwedan didome, serkeftin pêk tê.” 

Hevserokê Midûriyeta Venêrandinê ya Herêma Firatê Ehmed Daban jî bal kişand ser dîroka têkoşîna PKK’ê û da zanîn ku bi pêşengeya gelê Kurd gelên herêmê jî ber bi azadiyê ve dimeşin. Daban anî ziman ku tecrîda girankirî ya li ser Rêber Abdullah Ocalan parçeyekî komploya dijî vê têkoşînê hatiye destpêkirin e û bang li gelên herêmê kir ku ji bo şikandina tecrîdê rabin ser piyan.

Piştî axaftinan koma Botan a muzîkê ya girêdayî Naven Çand û Hunerê ya Baqî Xido, Koma Yasmîn a ji Efrînê hatibû, Kobarîn a Navenda Çanda Hîlala Zêrîn stranên xwe pêşkêş kirin.

Pîrozbahî bi govenda li ber stranan û dirûşmeyên wekî, “Bijî berxwedana gerîla”, “Bê Serok jiyan nabe” bidawî bû.

​HERÊMA CIZÎRÊ

Pîrozbahiyên li herêma Cizîrê, li Qamişlo, Hesekê, Tirbesipiyê, Dêrik, Til Koçer, Til Temir, Zirgan, Til Hemîs bi beşdariya deh hezaran kesan pêk hatin.  

QAMIŞLO

TEV-DEM’ê li avahiya Odeya Pîşesaziyê ya Bakûr û Rojhilatê Suriyeyê semînerek da. Hevseroka TEV-DEM’ê Rûken Ehmed di semînerê de axivî û destnîşan kir ku her salek Tevgera Azadiya Kurdistanê tê wateya nûbûnekê û got: “Di bingeha PKK’ê de wateya rasteqîn a şoreşê heye. Ji bo gelên Kurdistan û Rojhilata Navîn tê wateya azadî û demokrasiyê. Li 74 navendên cîhanê pêngava ji bo azadiya fizîkî ya Rêber Abdullah Ocalan hatiye destpêkirin jî hêza felsfeya Rêber Apo nîşan dide.”

Hevserokê TEV-DEM’ê Xerîb Hiso jî anî ziman ku PKK’ê û pêşengên wê bi berdêhên gelekî giranbûha nirxên mezin ava kirine, destan nivîsandine û ji bo gelan hêvî, bawerî ava kiriye.

TIRBESPIYÊ

Li navçeya Tirbespiyê ya Qamişlo li Salona Roj pîrozbahî hat lidarxistin. Di pîrozbahiya ku pêkhateyên Kurd, Ereb, Suryan tevlî bûn de, piştî rêzgirtinê, Endama Komîteya Malbatên Şehîdan a Tirbespiyê Dîrok Mela Beşîr axivî. Dîrok Mela Beşîr diyar kir ku derketina Rêber Abdullah Ocalan û tevgera azadiya Kurdistanê ji bo hemû gelên cîhanê meşaleya ku rêya diçe azadiyê ronî dike ye.

Piştî axaftinê komên muzîkê yên Şehîd Xebat û Awazên Çiya, her wiha hunermend Sîpanê Xelatê stranên xwe pêşkêş kirin. Şahî bi govendê bidawî bû.

DÊRIK

Li navçeya Dêrikê pîrozbahî li Stadyuma Kornîş hat lidarxistin. Di pîrozbahiya ku ji navda navçeyê û gundan bi sedan kes tevlî bûn de Wêneyên Rêber Abdullah Ocalan, alên PKK’ê û Meclîsa Malbatên Şehîdan hatin vekirin.

Endamê Meclîsa Malbatên Şehîdan a Dêrikê Elî Yusuf di pîrozbahiyê de axivî û salvegera PKK’ê li Rêber Abdullah Ocalan û tevahiya gel pîroz kir. Elî Yusuf soza şopandina têkoşîna û felsefeya Rêber Abdullah Ocalan da.

Pîrozbahî bi starên komên Cudî û Elefterya û govendê bidawî bû.

TIL HEMÎS

Li navçeya Til Hemîs a Qamişlo bi beşdariya endam û rêveberên sazî, meclîs, rêxistinên jin, ciwanan û şêx û rûsipiyên herêmê li navenda Çandê ya navçeyê pîrozbahî pêk hat. Di salona ku wêneyên Rêber Abdullah Ocalan û şehîdan hatin daliqandin de, Hevserokê PYD’ê yê Til Hemîsê Xalîb El-Seedûn axivî. El-Seedun salvegera damezirandina PKK’ê pîroz kir û got: “Avakirina PKK’ê li hemberî rejîmên otoriter û polîtîkayên qirkirinê ye. Di vê çarçoveyê de têkoşînek mezin meşandiye. Partiyê nirxên netewî, mirovî, şoreşgerî, fikrî û mirovên azad afirandine.”

Endamê QSD’ê Omer El Elî û Endamê Komîteya Malbatên Şehîdan a Til Hemîsê Ehmed El Xelef jî axivîn PKK ji bo gelên Rojhilata Navîn wekî benê rizgarkirinê ye.

Şahî stran û govendê bidawî bû.

TIL KOÇER

Li navçeya Til Koçer a Qamişlo jî li navenda navçeyê pankarta “Em salvegera damezirandina partiya xwe li tevahiya gel pîroz dikin” û wêneyên Rêber Abdullah Ocalan, alên PKK’ê hatin daliqandin.

HESEKÊ

Pîrozbahiya li bajarê Hesekê li Salona Silko ya li taxa Xişman hat lidarxistin. Bi sedan kesên ji navenda bajar û gundewarên wê tevlî pîrozbahiyê bûn. Endama Meclîsa Hesekê Fîdan Seydo di pîrozbahiyê da axivî û damezirandina PKK’ê li dijî rejimên zordar wekî roja vejînê pênase kir û pîroz kir.  Fîdan Seydo destnîşan kir heta pêkanîna projeya netewa demokratîk û azadiya fizîkî ya Rêber Abdullah Ocalan, ew ê têkoşîna xwe bidomînin.

Pîrozbahî bi starên komên Navenda Çand û Hunerê ya Serdemê û govendê bidawî bû.

TIL TEMIR Û ZIRGAN  

Welatîyên li navçeyên Til Temir û Zirganê jî pîrozbahiya xwe li baxçeyê Meclîsa Malbatên Şehîdan a Zirganê lidar xist. Endamê Komîteya Aborî ya Meclîsa Zirganê Semah Hemmadî di pîrozbahiyê de axivî û got: “PKK partiyeke ku azadî afirandî ye, veguheriye jiyanek azad û bi rûmet.

Hevserokê Meclîsa Til Temir Muhemmed Seîd El Ehmed jî bal kişand ser meşa şoreşgerî ya PKK’ê û got ku bi vê têkoşînê fikir û felsefeyek nû derketiye holê, PKK ji bo gelê Kurd û gelên Rojhilat Navîn bûye hêviya rizgariyê.  

Pîrozbahî bi starên komên Şoreş, Şehîd Sewsen Bîrhat û Şehîd Hewkar ên girêdayî Navenda Çand û Hunerê ya Xabûr û Koma Şehîd Berfîn Botan a girêdayî Navenda Çand û Hunerê ya Til Temir bidawî bûn. 

ŞEHBA

Koçberên Efrîn û şêniyên Şehbayê  jî li kampa Serdemê ya li Şehbayê pîrozbahî lidar xist.

Di pîrozbahiyê de Hevserokê Meclisa Kantona Efrîn û Şehbayê Ferhan Kobanê axivî û salvegera 45'emîn a PKK′ê li tevahî gelên cîhanê pîroz kir. Ferhan Kobanê got: "Beriya 45 salan PKK hate demezrandin. Ji demzerandina partiyê ve gelên me ketin ser rêya azadiyê û heya roja îro li ser xeta azadî û demokrasiyê dimeşin. Sala 1982'ê yan di zindana Amedê de hevalê Mazlûm Dogan dirûşmeya ′Berxwendan Jiyan e′ berz kir. Ev dirûşme heya roja îro tê gotin."

Pîrozbahî li ber starên hunermemdên Efrînê bi govendê dawî bû.