Ji merasîma sersaxiyê: Em li ser şopa şehîdên xwe ne

Şêniyên kantona Minbicê ji bo sersaxiya şehîd Luey Mihemed Seîd û şehîd Ehmed El Berho (Ebû Leyla) berê xwe da her du konên sersaxiyê.

Di merasîmên sersaxiyê de endamên Meclisa Malbatên Şehîdan, Meclisa Kombûna Jinan a Zenûbiya, Meclisa Leşkerî ya Minbicê, Rêxistinên Civaka Demokratîk, Rêveberiya Xweseriya Demokratîk a kantonê û rûspiyên eşîran beşdar bûn.

Konê sersaxiyê yê şehîd Ehmed El Berho li nêzî mala malbata wî li ser rêya Bîzar a li aliyê rojhilatê bajêr hat vedan û konê şehîd Luey Mihemed Seîd jî li taxa Hezawne ya naverasta bajêr hat vedan.

Her du endamên Meclisa Malbatên Şehîdan Mehmûd Bekar û Nîzar Derwîş di merasîmê de axivîn û got: "Şehîd rêberên têkoşîn û fedakariyê ne. Bi saya wan ewlehî û aramiya ku gelên Herêma Bakur û Rojhilatê Sûriyeyê tê de dijîn, hatine pêkanîn."

Yek ji fermandarên Meclisa Leşkerî ya Minbicê Mihemed Elaa jî soza şopandina rêya şehîdan û pêkanîna armancên wan ên parastina xak, gel û rizgarkirina wan, nû kir.

Endamê Nivîsgeha Ciwanan a Meclisa Minbicê ya Partiya Sûriya Pêşerojê Nasir Himêdî axivî û soza domandina têkoşînê heta dawiyê da.

Her wiha rêvebera Nivîsgeha Jinan a Meclisa Sivîl a Minbicê Sîham Şêxo diyar kir ku şehadet ji bo şêniyan cihê serbilindiyê ye, ew şêniyên ku ji bo azadî û ewlehiya xwe fedakariyê dikin.

Li bin konê sersaxiyê yê şehîd Ebû Leyla, apê şehîd Mihemed El Berho axivî û destnîşan kir ku ew ê ji bo rizgarkirina herêmê ji dagirkerên wek Erdogan her tiştî bikin.

Merasîm bi siloganên "Şehîd Namirin" bi dawî bû.

(mh)

ANHA