Bihabûna sotemeniyê li Girkê Legê kelûpel û kirêya rêyan jî biha kir

Bandorên bilindkirina bihayên sotemeniyê bandor li jiyana rojane ya şêniyên herêmê kir, di nav de jî li bajarê Girkê Legê yê herêma Cizîrê. Bilindbûna buhayên mazot û benzînê bandorê li buhayên kel û pelan, kiryar rêyan kiriye û  metirsî hene ku hinek tiştên mayî jî bên buhakirin û barê şêniyan ji yê niha girantir bibe.

Me piştî zêdekirina buhayên sotemeniyê, ji bo naskirina buhayên hejmarek ji cureyên sebze û mêwan li sûka bajarê Girkê Legê geriyan.

Li gorî bazirganên li Girkê Legê domandina bilindkirina buhayên sotemeniyê di vê astê de, dihêle ku buhayê kel û pelan jî zêde bibe, heke buhabûna sotemeniyê di vê astê de bimîne, tişta ku ew dibînin ew ê nêzî ji sedî 15 kel û pel jî biha bibin.

Kirêya çûn û hatinê ya Girkê Legê-Qamişlo berê bi 12 hezar lîreyên Sûriyeyî bû, niha bûye 50 hezar lîreyî. Kirêya taxsiyên xeta hundirîn a bajarê Girkê Legê ji bo kesekî berê bi 5 hezar lîreyî bû, niha bûye 10 hezar lîreyî.

AJOKAR: BIHABÛNA SOTEMENIYÊ ZIRARÊ DIDE ME Û ŞÊNIYAN

Ajokarê bi navê Ebdulkerîm Mihemed dibêje ku lêçûna çûn û hatinekê di nava bajaran de zêde bûye, tenê ji bo çûyîn û hatina carekê ya Girkê Legê-Qamişlo bi kêmanî 550 hezar lîreyan sotemenî tê xerckirin, li kêlek wê lêçûna tamîrkirina seyareyan heye.

Ajokar xeta Dêrik-Qamişlo Menîf Berdê jî da zanîn ku tişta ajokar bi dest dixe têra lêçûna sotemenî, zeyt û tamîrkirina seyareyan nake, ajokar jî welatî ne û beşeke ji van zehmetiyan radike ser milê xwe, lê bihabûna lêçûna xebitandinê wan neçarî zêdekirina kirêya rê dike.

Ajokarê xeta Qamişlo-Girkê Legê Şêro Icê diyar kir ku beriya niha ajokar lêçûna mazotê ji kirêya her kesekê radikir û jê sûd digirt, wê demê kirêya rê ji bo şêniyan jî guncaw bû.

Icê destnîşan kir ku rêjeya herî bilind a kesên ku diçin û tên, a nexweş, xwendekar û karmenda ye, ev dihêle ku bihabûna barê wan girantir bike.

Bandora zêdekirina buhayê sotemeniyê, her ku diçe berfirehtir dibe. Şênî û ajokar daxwaza danîna çareseriyekê ji bo sivikkirina barê şêniyan dike.

(sb)

ANHA