Bertek û nerazîbûnên li hember êrişên dewleta Tirk

Bertekên li hember êrişên dewleta Tirk a dagirker ên li dijî herêmên Bakur û Rojhilatê Sûriyeyê berdewam in.

QAMIŞLO

Kongra Star ji bo şermezarkirina êrişan xwepêşandanek li dar xist. Kongreyê her wiha fermandar Bêrîtan (Gulnaz Karataş) bi bîr anî.

Xwepêşandan ji pêşiya Navenda Çand û Hunerê ya Mihemed Şêxo dest pê kir û li pêş Stada Şehîdên 12`ê Adarê rawestiya. Li wir hevseroka Partiya Yekitiya Demokratîk (PYD) Perwîn Yusif axivî û berxwedana şehîd Bêrîtan silav kir. Perwîn wiha domand: "Ev êrişên dewleta Tirk îsbat dikin ku dijminên gelên herêmê li hember berxwedana gelê herêmê îflas kiriye.”

TIL HEMÎS

Di heman çarçoveyê de, şêniyên bajarê Til Hemîsê ji pêşiya Meclisa Bajêr dest bi meşekê kir û heta Çerxerêya El Sewami meşiyan. Li wir endama Kongra Star Mawiye El Hediye axivî û destnîşan kir ku ew dev ji rêya şehîd Bêrîtan bernadin.

Mawiye êrişên dewleta Tirk şermezar kir û got dê li ser rêya Rêber Abdullah Ocalan li hember êrişan li ber xwe bidin.

Hevserokê Partiya Yekitiya Demokratîk (PYD) şaxê Til Hemîsê Mihemed El Kemaş axivî û sûcên dewleta Tirk a dagirker ên li dijî herêmê şermezar kirin û li hember wan êrişan banga mezinkirina berxwedanê kir.

GIRKÊ LEGÊ

Şêniyên bajarê Gikê Legê, Çilaxa û Rimêlan ji Qada Şehîd Xebat dest bi meşê kir.

Meş li Çerxerêya Jinan rawestiya û veguherî mîtîngê. Di mîtîngê de, endama Kongra Star Nisrîn Mihemed axivî û got: "Heta êriş bi dawîn nebin, berxwedana me ranaweste.”

Nisrîn şehîd Bêrîtan bi bîr anî û soz da ku rêya wê temam bikin.

Meclisa Bajarê Girkê Legê jî, daxuyaniyek li navenda bajêr da. Cîgirê hevserokatiya Meclisa Bajarê Girkê Legê Metîn Elî axivî û destnîşan kir ku li hember êrişên dagirkeran dê li ber xwe bidin û tê bikoşin.

AMÛDÊ

Şêniyên bajarê Amûdê, endamên saziyên Rêveberiya Xweer li dijî êrişên dagirkeriyê meşiyan.

Meşê ji Qada Jina Azad dest pê kir û li çerxerêya Şehîd Cîhad rawestiya. Li çerxerêyê bi navê Însiyatîfa Gel a ji bo azadiya Rêber Abdullah Ocalan Mihemed Ehmed axivî û êrişên dewleta Tirk a dagirker şermezar kirin û soza berdewamkirina têkoşînê û bidestxistina serkeftinê da.

Her wiha endama Kongra Star Mura Zoro axivî û bang li her kesî kir ku têkoşînê mezin bikin.

HESEKÊ

Kongra Star li Parka Xabûr a bajarê Hesekê bi dirûşma "Li dijî dagirkeriyê û xiyanetê, jin, jiyan, azadî" çalakiyek li dar xist. Bi sedan şêniyên bajarên Hesekê, Til Temirê, Holê, Şedadê û Til Birakê, endamên rêxistinên jinan, sazî, partî û Kongreya Îslama Demokratîk a wan bajaran tev li meşê bûn.

Hevseroka Tevgera Civaka Demokratîk (TEV-DEM) Remziye Mihemed axivî û êrişên dewleta Tirk a dagirker şermezar kirin û destnîşan kir ku şehîd Bêrîtan bi çalakiya xwe ya sala 1992`yan ji dewleta Tirk û PDK`ê re peyamek ragihand ku ew nikarin vîna gerîla, gelê Kurdistanê û jinan têk bibin.

Hevserokê Meclisa Bajarê Hesekê Faûrq Tozo êrişên dewleta Tirk a dagirker şermezar kirin.

HELEB

Bi hezaran şêniyên taxên Şêxmeqsûd û Eşrefiye yên Helebê ji pêşiya Hola Civînan a 8`ê Adarê dest bi meşê kir.

Xwepêşandan li Çerxerêya Zeytûn a taxa Eşrefiye rawestî û veguherî mitingê. Di mitingê de, endama Meclisa Malbatên Şehîdan Eyşe Hiso axivî û got her çiqas êriş dijwar bin lê dev ji xeta şehîdan bernadin û dê têkoşîna wan bi serkeftinê tacîdar be.

Hevserokê Meclisa Giştî ya taxên Şêxmeqsûd û Eşrefiye yên Helebê Nûrî Şêxo êrişên dewlet aTirk a dagirker bi "sûcên hovane yên li dijî mirovahiyê" wesifand.

Şêxo destnîşan kir ku divê pisgirêka Kurd çareser bibe û divê azadiya fîzîkî ya Rêber Abdulah Ocalan pêk were.

KOBANÊ

Bi sedan şêniyên Kobanê li dijî êrişan derketin xwepêşandanê.

Şêniyên kantona Firatê, saziyên rêveberiya Xweser, rêxistinên jinan û partî tev li xwepêşandanê bûn ku ji Qada Jina Azad dest pê kiriye.

Xwepêşandan heta qada Şehîd Egîd dewam kir. Li wir, hevserokê PYD`ê şaxê kantona Firatê Bozan Xelîl axivî û got: "Têkoşîna 50 salî ya tevgera rizgariya Kurdistanê îro geş bû. Herêm di pêvajoyeke hesas re derbas dibe. Armanca êrişên duh, diyar e ku dixwazin gelê Kurd ê li Rojilata Navîn azad dijî, tune bikin."

Di dawiyê de Xelîl got: "Gelên herêmê dê projeya neteweya demokratîk berdewam bikin û dê bi vîna xwe bi ser bikevin."

DÊRAZOR

Meclisa herêma rojhilat a rojhilatê kantona Dêrazorê li pêşiya qada navneda perwerdeyê ya li bajarê Sûsê çalakiyeke protestoyî li dar xist. Endamên saziyên sivîl, komîteyên jinan, rûspiyên kantonê tev li çalakiyê bûn.

Di çalakiyê de daxuyaniyek hate dayîn. Endama Komîteya Kombûna Jinan a Zenûbya ya rojhilatê kantona Dêrazorê Sefa El Ehmed daxuyanî xwend. Di daxuyaniyê de bang hevgirtinê hate kirin. Her wiha bang li her kesî hate kirin ku ji her demê bêtir bibin yek û ji bo parastina welêt li qadan bin.

(şx)

ANHA