Analîzkerê Iraqî: Banga Rêber Abdullah Ocalan peyameke kûr e

Analîzkerê siyasî yê Iraqê Esed El Ebadî diyar kir ku banga Rêber Abdullah Ocalan gelek ji êşên gelê Kurd ên ji ber bidestxistina mafên xwe di nav xwe de hewandin û bang li dewleta Tirk a dagirker kir ku ji bo pêkanîna aştiyê xwedî li berpirsiyariya xwe derkeve.

28 sibat, 2025 09:04

NAVENDA NÛÇEYAN

MEDYA HENAN

Banga dîrokî ya Rêber Abdullah Ocalan bi awayekî berfireh di nav çapemeniya Erebî û cîhanê, siyasetmedar û civakê bi giştî de deng veda.

Rêber Abdullah Ocalan di banga xwe de got ku di sedsala 2’yemîn a komara Tirkiyeyê de demokrasî nebe yekitiya domdar jî nabe û banga çekdanînê kir.

Der barê vê bangê û pêvajoya guhartina demokratîk de, analîzkerê siyasî yê Iraqê Esed El Ebadî ji ajansa me re diyar kir ku wan bala xwe dida tevgera azadiya Kurdistanê û Rêber Abdullah Ocalan û li benda peyama wî bûn.

El Ebadî got: “Peyama birêz Ocalan diyar dike ku bi demê re û bi guhartinên ku di 40 salan de pêk hatine re, ku tê de têkoşîna ji bo bidestxistina mafan pêş ketibû, êdî divê ew qonax me bi rê ve bibin, wekî ku Rêberê Kurd ê mezin, Rêberê tevgera azadiya Kurdistanê diyar kiribû.”

El Ebadî wiha domand: “Peyama ku me bihîst kurtkirî bû, lê belê gelek ji êşên gelê Kurd ên ji bo bidestxistina mafên xwe û ketina nav xebata siyasî di nav xwe de hewandin. Ez bawer im ev jî armanca me hemiyan e.”

‘EM PÊŞ DIBÎNIN KU QONAXA BÊ QONAX XÊRÊ Û AŞTIYÊ BE’

El Ebadî diyar kir ku ew pêş dibîne ku qonaxa bê qonaxa xêr, aştî, avakirin û vegerandina mafan be, ew mafên ku şehîdan ji bo wan û ji bo rojeke wek roja îro ku tê de gel bi azadî û rûmet bijîn, canê xwe feda kiriye.

El Ebadî destnîşan kir ku di qonaxa bê de dibe ku guhartinên mezin ne tenê li Tirkiyeyê her wiha li seranserî Rojhilata Navîn û bi taybetî oi seranserî Kurdistanê pêk werin, çi li Sûriye, Iraw û Îranê be jî.

El Ebadî wiha zêde kir: “Ez bi vê peyamê pir kêfxweş û spasdar im û gelê Kurd ê giranbuha jî yê ku bi têkoşîna Rêbertî û Partiya Karkerên Kurdistanê (PKK) gihîştiye vî astê, pîroz dikim.”

El Ebadî bang li desthilata Tirk a dagirker kir ku xwe li hemberî vê peyamê û li hemberî erkên xwe yên pêkanîna aştiyê li Tirkiyeyê û seranserî herêmê, berpirsiyar bibîne.

(mh(