ˋDema em behsa azadiyê dikin yekser şehîd tên bîra meˊ

Xelkê bajarê Qamişlo û endamên saziyên sivîl, nûnerên partiyên siyasî, Rêxistinên Civaka Sivîl, endamên Hêzên Ewlekariya Hundirîn berê xwe da konê sersaxiyê yê şehîd Hêvî Umut û Heqî Qamişlo. Konê sersaxiyê li pêş Pakrewangeha Şehîd Delîl Saroxan a Qamişloyê hat vedan.

Endama Meclisa Malbatên Şehîdan a Qamişlo Şemsîxan Gulo sersaxî da malbatên her du şehîdan û tevahî malbatên şehîdan û teqezî bi yekitiya gelan ji bo bidestxistina azadiyê da.

Şemsîxan diyar kir ku ew amade ne li hember tevahî êriş û her xeteriyekê li dijî herêmên Bakur û Rojhilatê Sûriyeyê bisekinin.

Şemsîxan soz da tevahî şehîdan ku li ser şopa wan heta pêkanîna armancên wan bimeşin.

ˋSOZA XWE BI CIH ANÎNˊ

Li aliyekî din jî endamê Nivîsgeha Têkiliyan a Meclisa Leşkerî ya Qamişlo Kawa Gulo diyar kir ku ew ê têkoşîna şehîdan bişopînin û heta pêkanîna armancên şehîdan gav bi paş de naavêjin.

Gulo destnîşan kir ku bi hezaran şervanên QSDˋê soz da û heta gihaştin şehadetê soza xwe bi cih anîn û got: "Dema em behsa azadiyê dikin, yekser şehîd û fedekariyên wan tên bîra me. Şehîd meşaleyên azadiyê ne."

Her wiha endama Meclisa Kongra Star a Qamişlo Leyla Murad axivî û got: "Ji bo me domandina berxwedan û têkoşînê cihê serbilindiyê ye."

Fermandara YPJ`ê Hêvî Umut 11`ê Mijdarê (2024) dema beşdariya merasîmê bîranîna şehîdên rizgarkirina bajarê Şengalê bibû di encamê êrişeke hewayî ya dewleta Tirk a dagirker de şehîd bû. Şervanê QSD`ê Heqî Qamişlo (Mihemed Elî Ebas) jî 22`yê Mijdarê dema li ser erka xwe bû li bajarê Hesekê şehîd bû.

(fr)

ANHA