YPG'ê bi malbatên şehîdan ên Qamişloyê re civiya

Bi slogan "Şehîd felsefeya jiyana azad e" îro Yekîneyên Parastina Gel (YPG) ji  malbatên şehîdan ên taxên Kornîş, Hilêhiyê û gundê Hîmo yên bajarê Qamişlo civînek li dar xist.

Civîn li hola Rewabî ya li aliyê rojavayê bajarê Qamişlo hate lidarxistin. Hol bi alên YPG, YPJ, QSD, Meclisa Malbatên Şehîdan û wêneyên rêber Abdullah Ocalan hate xemilandin.

Civîn bi rêzgirtinê dest pê kir, dûvre Berdevkê Fermî yê YPG`ê Nûrî Mehmûd axivî û got: "Ji bo min cihê serbilindayîyê ye ku ez li vir û li hemberî malbatên şehîdan sekinîme, şehîdan ji bo parastina zarokên welatê xwe li ser bingehên demokratiyê û parastina mirovahiyê canê xwe feda kir."

Nûrî Mehmûd da zanîn ku malbatên şehîdan pêşengên wan in û wiha gotina xwe dewam kir:"Heke ne ji fikir û helwesta şehîdan û erka parastina xakê ku girtin ser xwe bûya dê herêmên Bakur û Rojhilatê Sûriyê herêmên DAIŞ`iyan bûya, li Bakur û Rojhilatê Sûriyê derdora 11 hezar şehîd hene û li dijî DAIŞ û sîstemên şofînîst ên tundrew ku artêşa Tirk di nav de ye, efsaneyên dîrokî nivîsandine."

Berdevkê Fermî YPG`ê Nûrî Mehmûd got ku divê her kes bi erka xwe rabe, destkeftiyên ku bi saya şehîdan hatine bidestxistin, biparêzin û bi vî awayî ew bikarin xwe bigihînin Sûriyeke demokrat, destûrekî demokrat ku rêzê ji azadiyê, rûmet, çand û ola civakan re bigire.

Di dawiya civînê de Koma Botan a Desteya Çand û Hunerê ya herêma Cizîrê stranên der barê şehîdan gotin û zarokekê ji Koma Kulîlkên Kurdistanê helbestek xwend.

(eh)

ANHA


Mijarên Din