Xerîb Hiso: Koalîsyona Navdewletî berpirsê êrişên li ser Şengalê ye

Hevserokê TEV-DEM`ê Xerîb Hiso got: “Koalîsyona Navdewletî ya Têkoşîna li dijî DAIŞ`ê û hikumeta Iraqê berpirsên êrişên artêşa Tirk ên li ser bajarê Şengalê ne.”

Dema bajarê Şengalê ji aliyê çeteyan ve hatibû dagirkirin, artêşa Tirk qet êriş nedikir. Lê ji dema hatiye rizgarkirin her dibe hedefa artêşa Tirk. DAIŞ`ê Tebaxa 2014`an êrişî bajarê Şengalê kirin, bi hezaran sivîl qetilkirin, bi hezaran jinên êzidî revandin û perestgehên êzidiyan hilweşandin.

Lê şervan, Yekîneyên Berxwedana Şengalê, Yekîneyên Jin di 13’ê Mijdara 2015`an bajar ji DAIŞ`ê rizgar kirin. Bajarê Şengalê dikeve rojavayê parêzgeha Nînowa ya bakurê Iraqê û ji dema hatiye rizgarkirin dibe cihê hedefgirtina balafirên Tirkiyê û Koalîsyona Navdewletî ya Têkoşîna li dijî DAIŞ`ê parastina asmanê Iraqê dike.

‘ÊRIŞÊN TIRKIYÊ TOLHILDANA TÊKÇÛNA DAIŞ`Ê NE’

Beriya heftiyekê artêşa Tirk bi balafiran êrişî gundê Dugirê yê Şengalê kir û di encamê de 4 şervanên Yekîneyên Parastina Berxwedana Şengalê şehîd bûn.

Têkildarî hedefgirtina domdar a Şengalê hevserokê TEV-DEM`ê Xerîb Hiso axivî û got: “Di nava gelê Iraqê de civaka êzidî navdar in û destûra Iraqê îtîrafê bi gelê êzidî dike. Lê dewleta Tirk di sala 2014`an de  piştevanê sereke yê DAIŞ`ê bû. Li Şengalê gelê êzidî bi fermanan re rû bi rû ne. Nexasim êrişên çeteyên DAIŞ`ê yên li dijî herêmê. Li gel ku artêşa Tirk piştevanê sereke yê DAIŞ`ê bû û ticarî ji bo çeteyan ji herêmê derbixe, şer nekir. Gelê êzidî xwe birêxistin kir, hêza xwe ava kir û bi vîna xwe Şengalê rizgar kir. Ji ber çeteyên DAIŞ`ê bi saya hêza gelê êzidî li Şengalê têkçûnên, dewleta Tirk domdar êrişî herêma Şengalê dike û bi vê yekê tola çeteyan radike.”

HISO BÊDENGIYA HIKUMETA IRAQÊ REXNE KIR

Xerîb Hiso bêdengiya hikumeta Iraqê beramberî êrişên artêşa Tirk rexne kir û wiha anî ziman: “Gelên Iraqê bi welat, hikumet, wezaret û artêşa xwe serbilind in. Wê demê çawa dewleta Tirk serweriya vî welatî derbas dike? Ev tê wateya siyaseteke plankirî heye. Artêşa Tirk îşaret ji hikumeta Iraqê dîtiye ku êriş dike û careke din li dijî Şengalê komkujiyan pêk tîne.”

‘KOALÎSYONA NAVDEWLETÎ BERPIRSA ÊRIŞÊN LI DIJÎ ŞENGALÊ YE’

Xerîb Hiso Koalîsyona Navdewletî ya Têkoşîna li dijî DAIŞ`ê berpirsa êrişên li dijî Şengalê dibîne û wiha nirxand: “Qaşo Koalîsyona Navdewletî parastina asmanê herêmê ji balafirên keşfê dike.”

‘ÊZIDÎ DI TÊKOŞÎNA XWE DE BI ISRAR IN’

Hevserokê TEV-DEM`ê Xerîb Hiso bal kişand ser berxwedana êzidiyan û wiha got: “Artêşa Tirk nikare vîna gelê êzidî bişkîne. Ji ber gelê êzidî bi ola xwe ve girêdayî ne û ji bo jinên ji aliyê çeteyên DAIŞ`ê ve hatine revandin têkoşîna xwe didomînin.”

Hiso bang li civaka êzidî kir û got, çi dibe bila bibe divê gelê êzidî asta têkoşîna xwe bilind bikin.

‘TIRKIYÊ HEWL DIDE DEMOGRAFIYA HERÊMÊ BIGUHER E’

Hiso got: “Dewleta Tirk hewldana guhartina demografiya herêmê dike. Tirkiye gelê êzidî û hêzên parastina Şengalê dike armanc. Hewldana koçberkirina gel dike da ku malbatên çeteyan bi cih bike. Ev yek bandorê li xaka Rojava, Başûr û Rojhilata Navîn pêk ve dike.”

(eh)

ANHA


Mijarên Din