Xebatên pêşîlêgirtina belavbûna Koronavîrusê dewam dikin

Hemleyên paqijkirin û dezenfektekirinê li seranserê herêmên Bakur û Rojhilatê Sûriyê ji bo pêşîlêgirtina belavbûna Koronavîrusê, dewam dikin. Komîteyên Zabîteya Serfkaran û daîreyên Zemhîrê ji aliyê xwe ve gerên çavdêriya dikanan zêde kiriye.

Li gorî biryarên Şaneya Kirîzê ya Bakur û Rojhilatê Sûriyê, Şaredariya Gel a navçeya Tirbespiyê hemleyeke paqijkirin û dezenfektekirin li hemû saziyên navçeyê, cihên olî, dêran, mala êzidiyan da destpêkirin. Her wiha kolana sereke, sûka navendî, sûka sinaî û deriyên ketin û derketina navçeya Tirbespiyê paqij kir.

Hevserokê Şaredariya Gel a Navçeya Tirbespiyê Ebdulezîz Mihemed wiha got: "Em kar û xebatê şaredariyê li gorî biryarên Şaneya Kirîzê ya Bakur û Rojhilatê Sûriyê, bi rêxistin dikin."

Ebdulezîz diyar kir ku bi pêkanîna biryara qedexeya derketina derve re, hemû kolanên serke yên navçeyê, sazî, cihên olî û şaredariyên girêdayî navçeyê hatin paqijkirin û dezenfektekirin.

Şaredariya Gel a navçeya Tirbespiyê belavokên girêdayî çawaniya xweparastina ji Koronavîrusê belav kir. Her wiha Zabîteya Şaredariya Gel bi hevkariya Komîteya Tenduristiyê bi gerên çavdêriyê li ser dikanên firotina sebze û goşt li sûka navendî, radibe.

ŞEHBA

Li herêma Efrînê jî şaredariyên gel hemleyên dezenfektekirinê dewam dikin û ji bo xweparastina ji vîrusê madeya "Sodium hypochlorite" ya bi rêjeya ji sedî 6 bi kar tîne.

Şaredariyên herêma Efrînê hemleyên dezenfektekirinê dane destpêkirin. Her wiha 5 sahrîc bi madeya "Sodium hypochlorite" ji kargeha dermanan a li gundê Kefer Qaris a girêdayî navçeya Ehdes, dagirt.

Ajansa me ANHA`yê hemleyên dezenfektekirinê şopand. Serokê Şaredariya Gel a kantona Efrînê Faiq Ehmed wiha got: "Bi belavbûna Koronavîrusê re, pêwîstiya me û tevahî şaredariyan bi tedbîrên xweparastinê heye. Bi taybetî jî piştî biryara Rêveberiya Xweser a qedexeya derketina derve. Ji ber vê yekê me hemleyên dezenfektekirinê zêde kirin."

Ehmed wiha dewam kir: "Li ser vê esasî, em ê bi 5 sahrîcên mezin madeya Kilorê li hemû navçeyên kantona Şehbayê bi rêk û pêk, belav bikin."

Ehmed di dawiya axaftina xwe de bang li şêniyan kir ku ji bo parastina tenduristiya xwe, li gorî biryarên Rêveberiya Xweser tevbigerin.

Ji 23`ê Adarê de li hemû bajar, navçe û bajarokên Bakur û Rojhilatê Sûriyê qedexeya derketina derve heye. Tê payîn ku qedexe heta 15 rojan dewam bike û dibe ku hîna bê dirêjkirin.

(cx)

ANHA


Mijarên Din