Turnuvaya Şehîdên Komkujiya Şengalê dest pê kir

Mala Êzidiyan a navçeya Tirbespiyê turnuvaya futbolê bi beşdarbûna hemû pêkhateyan bi navê "Şehîdên Komkujiya Şengalê" di salvegera 5`an a komkujiyê de ku çeteyên DAIŞ`ê li Şengalê pêk anî, li dar dixe.

Bi beşdarbûna 16 tîmên ji hemû pêkhateyên navçeya Tirbespiyê ya kantona Qamişlo ji Kurd, Suryan û Ereban, duh turnuvaya futbolê li gundê Otlacê yê bakurê navçeyê dest pê kir. Mala Êzidiyan di salvgera 5`an a komkujiya ku çeteyên DAIŞ`ê li Şengalê li ser gelê êzidî pêk anî, turnuvayê bi rêxistin dike.

Turnuvaya bi navê "Turnuvaya Şehîdên Komkujiya Şengalê" dê 2 hefteyan dewam bike, dê Mala Êzidiyan di dawiya turnuvayê de xelatan li tîmên ku bi ser ketine, belav bike.

Endamê rêveberiya Mala Êzidiyan a navçeya Tirbespiyê Ziyad Rûstem ji ANHA`yê re axivî û got armanc ji kombûna wan û beşdarbûna hemû pêkhateyan, nameya rastiya vî gelî dide ku hemû bi hev re dijîn û gelê êzidî ne gelekî cuda ye û ew hevgirtî ye bi hemû pêkhateyên din re.

Hêjayî bibîrxistinê ye ku maça destpêkê ya turnuvayê duh hate lîstin, tîmên Meşûq û Cerah derketin pêşberî hev û tîma Meşûq bi ser ket.

ANHA


Mijarên Din