Straneke nû bi navê ‘Waşokanî’ derket

Hunermend Nûrî El-Elî bi armanca xuyakirina berxwedana bajêr û şêniyên wê, vexwendina partiyên Kurd ji bo yekitiya kurdî, straneke nû bi navê ‘Waşokanî’ li ser Berxwedana Rûmetê ya Serêkaniyê ya dagirkirî derxist.

Piştî ku Serêkaniyê ji aliyê dewleta Tirk a dagirker û çeteyên wê ve di 9`ê Cotmeha 2019`an de hate dagirkirin, gelek hunermendên Kurd stran li ser berxwedana gelê Kurd li dijî sûc û komkujiyên dewleta Tirk ên li dijî sivîlan derxistin.

Hunermend Nûrî El-Elî piştî ku salek di ser dagirkirina bajarê Serêkaniyê re derbas bû, straneke nû bi navê Waşokanî derxist.

Stran rastiya berxwedana ku li dijî dagirkeriya Tirk û çeteyên wê hatiye raberkirin, nîşan dide. Her wiha girîngiya yekitiya kurdî û piştgiriya hêzên leşkerî rave dike. Her wiha stran rastiya koçberên ku di dema êrişa li ser Serêkaniyê û Girê Spî de li kampa Waşokanî bi cih bûbûn, vedibêje.

Derhênerê stranê helbestvan Siûd Hisên e. Ê ku awaz çêkiriye û stran gotiye jî Nûrî El-Elî ye. Stran li studyoya hunermend Nûrî El-Elî ya taybet a li Dirbêsiyê hatiye amadekirin.

Nûrî El-Elî ji dayîkbûnê ve kor e, lê ev mijar li ber behreya wî ya hunerî nebû asteng. Heta niha nêzî 303 stranên folklorîk û şoreşgerî gotine. Bavê wî û xalên wî jî hunermend bûn. Nûrî di 7 saliya xwe de dest bi vegotina stranan kiriye. Beşdarî gelek komên muzîkê yên wekî Koma Şehîd Zîlan, Waşokanî û Şoreş bûye. Her wiha gelek stran li ser şoreşa Rojava û berxwedana wê jî nivîsandine.

Ev strana ku Nûrî El-Elî derxistiye dibe strana wî ya duyemîn li ser berxwedana Serêkaniyê.

ANHA


Mijarên Din