Şêniyên Til Birakê: Em xaka ku bi xwîna şehîdan hatiya avdan, bernadin

Pêkhateyên navçeya Til Birak a herêma Cizîrê gefên dewleta Tirk ên li dijî herêmên Bakur û Rojhilatê Sûriyê şermezar kirin û tekez kir ku li rex QSD’ê ne ku bi hezaran qurbanî dane. Her wiha şêniyan diyar kir ku xaka ku bi xwîna şehîdan hatiye avdan, bernadin.

Îro danê nîvro, bi sedan şêniyên navçeya Til Birak a girêdayî kantona Qamişlo meşiyan ku gefên dewleta Tirk ên li dijî herêmên Bakur û Rojhilatê Sûriyê şermezar kirin.

Meş ji pêş têketina navçeya Til Birak a başûr dest pê kir û ber bi Çerxerêya Şehîdan a li naverasta navçeyê ve pêk hat. Meşvanan pankartên "Dewleta dagirker a Tirk, dagirkeriya talan û diziyê ye", "Meşa gelan li dijî dewleta dagirker a Tirk", "Bimire dagirkerî...bijî biratiya gelan"  hilgirtin û dirûşmên "Erdoganê kujer" berz kirin.

Meş li Çarxerêya Şehîdan vegerî mîtîngê. Dûre endamê Meclisa Malbatên Şehîdan Weid Elewî, endamê Meclisa navçeyê Mihemed Elî û endama Kongreya Star Henan Silêman axivîn.

Axêveran gefên dewleta Tirk ên li dijî herêmên Bakur û Rojhilatê Sûriyê şermezar kirin û tekez kir ku tevahî pêkhate li rex QSD’ê ne ku bi hezaran şehîd dane û diyar kir ku amade ne hê zêdetir şehîdan bidin û xaka ku bi xwîna ciwanên wan hatiye avdan ,bernadin.

Meş bi dirûşmên şermezarkirina gefên Erdogan ên li dijî herêmên Bakur û Rojhilatê Sûriyê û bêdendiya navdewletî der barê van gefan de, bi dawî bû.

(fr)

ANHA


Mijarên Din